Gobiernu del Principau d'Asturies

Asturies, muncho más cerca

Tas en

Asturias.es Gobiernu Delegaciones del Gobiernu Tolos conseyeros y conseyeres del Gobiernu d'Asturies van ...
 

Delegaciones del Gobiernu

Tolos conseyeros y conseyeres del Gobiernu d'Asturies van comparecer énte'l grupu de trabayu de la Xunta Xeneral pal siguimientu del coronavirus

Juan Cofiño y Borja Sánchez, los únicos pendientes, van intervenir la selmana próxima. El presidente Adrián Barbón fízolu a pitición propia'l 13 d'abril y los titulares de Derechos y Servicios Sociales y de Salú asisten toles selmanes. L'Executivu considera que la so presencia siguida constata tanto la so voluntá de tresparencia como la so disposición plena a collaborar cola Cámara

23/04/2020

Juan Cofiño, vicepresidente del Principáu, y Borja Sánchez, conseyeru de Ciencia, Innovación y Universidá, van comparecer la selmana próxima énte'l grupu de trabayu de la Xunta Xeneral pal siguimientu y evaluación del coronavirus. Con estes intervenciones, el Gobiernu d'Asturies al completu —el presidente y tolos conseyeros y conseyeres— intervién énte'l Parllamentu. L'Executivu considera qu'esta presencia siguida constata la voluntá de tresparencia, una de les sos pautes d'actuación desque empezó la crisis sanitaria, asina como la so disposición plena a collaborar cola Cámara.

El grupu de trabayu caltién xuntes telemátiques por cuenta de les condiciones del estáu d'alarma, qu'obligaron a restrinxir l'actividá presencial na Xunta Xeneral. Dende la so constitución el 31 de marzu, comparecieron el xefe del Gobiernu y los titulares de Presidencia, Facienda, Industria, Educación, Salú, Derechos Sociales, Desenvolvimientu Rural y Cultura. La primera de les sesiones celebróse'l 2 d'abril col conseyeru d'Industria, Enrique Fernández. Pela so parte, Pablo Fernández Muñiz, conseyeru de Salú, y Melania Álvarez, conseyera de Derechos Sociales y Bienestar, participen toles selmanes. El conseyeru de Salú, los vienres, y la conseyera de Derechos Sociales, los martes.

El presidente del Principáu intervieno'l 13 d'abril a pitición propia, lo mesmo que lo van facer Juan Cofiño y Borja Sánchez, quien rexistraron la so solicitú ayeri mesmu. Ye previsible que'l vicepresidente participe'l llunes y el conseyeru de Ciencia va facelo’l miércoles. Aparte, tamién tán previstes, yá pa una selmana depués, les comparecencies de Carmen Suárez (Educación), Berta Piñán (Cultura) y Alejandro Calvo (Desenvolvimientu Rural), quien yá tuvieron ocasión d'informar a tolos voceros parllamentarios.

El Gobiernu d'Asturies repite que la tresparencia na información sobre la evolución de la crisis va siguir siendo máxima. A diariu facilita datos alrodiu de los indicadores sanitarios principales, asina como sobre la situación de les residencies de mayores (tanto públiques como privaes), especialmente castigaes pola epidemia de la COVID-19. A diferencia d'otres comunidaes, el Principáu nunca tuvo que modificar la so pauta informativa pa garantizar la certidume de los sos datos. Al tiempu, l'Executivu autonómicu sorraya la so disposición a collaborar col parllamentu asturianu nos términos que la mesma Xunta Xeneral determine.

Información sobre el documento

© Copyright 2006. Gobiernu del Principau d'Asturies