Gobierno del Principado de Asturias

Asturias, mucho más cerca

Estás en

Aniciu Temes Ociu y tiempo llibre Asturias promociona el Camín de Santiago na feria internacional ...
 

Ociu y tiempo llibre

Asturias promociona el Camín de Santiago na feria internacional de turismo ITB de Berlín

 El Principáu va entamar alcuentros con profesionales del sector y medios de comunicación p'amosar los recursos y el potencial de la comunidá nel mercáu alemán

08/03/2016

Asturies va presentar la so ufierta turística, especialmente los itinerarios venceyaos al Camín de Santiago, nuna de les feries más importantes del mundu, la ITB de Berlín, que celebra esti añu el so 50 aniversariu y que va abrir les sos puertes mañana. El Principáu, que va disponer d'un espaciu reserváu nel certame gracies a la collaboración con Turespaña, va amosar los sos recursos y va entamar 24 alcuentros con operadores turísticos y medios de comunicación.
El director xeneral de Comerciu y Turismu, Julio González Zapico, va asistir mañana a los actos d'apertura de la ITB, que l'añu pasáu recibió a 175.000 persones.
El mesmu día de la inauguración celebraráse un alcuentru pa promocionar los itinerarios del Camín de Santiago, tantu la ruta de la Mariña como'l Camín Primitivu. L'actu va contar cola participación de siete operadores especializaos y cinco asociaciones xacobees alemanes qu'axunten a más de 1.800 asociaos.
Según datos de la Oficina del Pelegrín, pel Camín del Norte y el Primitivu pasaron en 2015 27.301 persones, una cifra que prácticamente sextuplica la rexistrada en 2005. Los turistes de nacionalidá alemana que realizaron la ruta xacobea en cualesquiera de les sos variantes l’añu pasáu representen el 7,2% del total, tan solo per detrás d'españoles ya italianos.
Amás, los últimos datos publicaos pol Institutu Nacional d'Estadística indiquen qu'el 13% de los visitantes internacionales que recibe Asturies provién d'Alemaña. Esti mercáu esperimentó un crecimientu del 55% nos últimos años, hasta asitiase na segunda posición, tres el francés, na contribución al turismu asturianu. El alemanes que visiten la España Verde fáenlo atraíos pola so ufierta cultural, gastronómica y natural.

 

Información sobre el documento

© Copyright 2006. Gobierno del Principado de Asturias