Gobierno del Principado de Asturias

Asturias, mucho más cerca

Estás en

Aniciu Temes Emplegu Función Pública El procedimientu selectivu del cuerpu de maestros va axuntar ...
 

Función Pública

El procedimientu selectivu del cuerpu de maestros va axuntar mañana 6.234 aspirantes pa cubrir 781 places

La primer prueba completa va desenvolvese nel campus universitariu d’Uviéu y la segunda, nes sedes de caúna de les siete especialidaes ufiertaes. nel procesu van participar 78 tribunales que disponen d’instrucciones de la Conseyería d’Educación y Cultura y d’un documentu resume de pautes xenerales d’actuación

21/06/2019

El principiu del procedimientu selectivu del cuerpu de maestros va axuntar mañana 6.234 aspirantes pa cubrir les 781 places ufiertaes en siete especialidaes: 225 d’Educación Infantil, 110 d’Inglés, 70 d’Educación Física, 50 de Música, 110 de Pedagoxía Terapéutica, 40 d’Audición y Llinguaxe y 176 de Primaria.

La primer parte del exame va facese nel campus universitariu d’Uviéu, onde se va desenvolver la parte teórica, a partir de les 8:30 hores, y el supuestu prácticu, dende les 12:45. La Policía Local y Protección Civil van collaborar pa resolver cualquier incidente puntual que pueda producise.

Les siguientes actuaciones -les llectures y la segunda prueba- van realizase nes sedes de cada especialidá, repartíes en dellos centros educativos d’Uviéu, Xixón y Avilés.

La Conseyería d’Educación y Cultura dio instrucciones a los 78 tribunales que van participar nel desenvolvimientu del procesu, que tamién cunten con un resume de pautes xenerales d’actuación pa facilitar el so llabor.

Pela primer vez, el procedimientu selectivu ta informatizáu, de manera que cada aspirante va disponer de toles convocatories y va obtener les actes de calificaciones al traviés del portal Educastur. Amás, desque se publicó la convocatoria, los opositores puen consultar un documentu de preguntes y respuestes.

El Principáu facilitó, amás, una guía p’aspirantes que da información detallada sobre’l desenvolvimientu del procesu selectivu y pon a la so disposición un corréu electrónicu, aparte de dellos númberos de teléfonu qu’al traviés d’ellos puen resolvese duldes.

Toles persones que se presenten mañana van cuntar con una llista col temariu de la so especialidá que van poder consultar nel momentu en que-yos comuniquen el resultáu del sortéu correspondiente.

Trescurrida la primer prueba, el personal aspirante va poder solicitar la comprobación del cálculu correctu de la so calificación, d’alcuerdu colos criterios de valoración publicaos n’Educastur el 31 de mayu.

 

Información sobre el documento

© Copyright 2006. Gobierno del Principado de Asturias