Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu L'hospital de Xarrio y el polígonu de Riopinto van conectase ...
 

Infraestructures y territoriu

L'hospital de Xarrio y el polígonu de Riopinto van conectase anguaño a la depuradora del Navia-Coaña

Infraestructures invirtió nos últimos años casi 20 millones nel sistema de saneamientu de la ría

10/03/2020

Los arramaos del hospital de Xarrio, el polígonu de Riopinto y el núcleu de Mohías van incorporase anguaño a la estación depuradora d'agües (Edar) residuales Navia-Coaña, una vegada entren en serviciu los bombeos correspondientes. Asina lo aseguró güei la directora de Calidá Ambiental y Cambéu Climáticu, Paz Orviz, nes xuntes que caltuvo cola alcaldesa del conceyu, Rosana González, y con vecinos del conceyu para informa-yos sobre la situación de les obres de saneamientu del conceyu.

Orviz, que señaló que les conexones a la depuradora de la ría del Navia van significar “una meyora bien relevante na meyora de la calidá de les agües del conceyu y por tanto na so calidá medioambiental”, resaltó la inversión realizada pol Principáu nos últimos años na zona de la ría de Navia, de casi 20 millones.

La directora indicó tamién que'l bombéu de Coaña, anguaño en fase de redacción de proyectu, va poner en serviciu en 2021. Coles mesmes, señaló qu’ anguaño tamién ta previsto conectar a la depuradora la parte pindia de Foxos.

El Gobiernu asturianu punxo en serviciu n'ochobre de 2018, la estación depuradora Navia-Coaña, diseñada pa dar serviciu a unos 17.000 habitantes y atender a localidaes de dambos conceyos. La construcción d'esta depuradora supunxo una inversión de casi 7 millones.

El conxuntu de redes de colectores y la depuradora del sistema de saneamientu de la ría del Navia son esplotaos y calteníos pol Consorciu d'Agües d'Asturies (Cadasa) qu'emplega a 6 trabayadores, con un costu añal de 500.000 euros

Tocantes a les redes de colectores que configuren el sistema de saneamientu de la ría del Navia, la inversión ronda los 12,7 millones. Esta actuación ta parcialmente executada, “anque en fase bien avanzada d'execución, polo que s'espera que'l saneamientu de Coaña tea arregláu prácticamente a lo llargo d'esti añu”, dixo Orviz.

No que se refier al conceyu de Navia, los nuevos colectores recueyen yá les agües residuales de la población de Navia y La Colorada y ta prevista la incorporación de los núcleos d’Andés, Talarén, Villapedre, Piñera y Puertu, ente otros núcleos.

Per otra parte, Paz Orviz esplicó que la Conseyería d'Infraestructures, Mediu Ambiente y Cambéu Climáticu yá axudicó les obres de saneamientu d'esta localidá, con una inversión de 705.119 euros.

L'actuación, que ta prevista pal branu de 2021la so finalización, va consistir na renovación de tramos deficientes l'actual rede, complementando con nuevos ramales. En xunto, van instalase 2.270 metros de colectores de 315 mm de diámetru, y van executase 145 pozos de rexistru y 66 arquetes domiciliaries. La población sirvida va ser de 396 habitantes.


Icono gráfico alusivo al tipo de archivo Audiu (Audiu: 938 Kb) (n'español)

Información sobre el documento

© Copyright 2006. Gobiernu del Principau d'Asturies