Gobiernu del Principau d'Asturies

Asturies, muncho más cerca

Tas en

Asturias.es Temes Servicios sociales 14.754 beneficiarios del salariu social, el 66 % del total, ...
 

Servicios sociales

14.754 beneficiarios del salariu social, el 66 % del total, dieron el preste p’acceder al ingresu mínimu vital

El Principáu recuerda que toles persones que cobren la prestación autonómica social van siguir percibiéndola hasta que se resuelvan les sos solicitúes

05/09/2020

Los conceyos y la Conseyería de Derechos Sociales y Bienestar recibieron l’autorización de más de 14.700 beneficiarios del salariu social pa pasar a percibir l’ingresu mínimu vital, lo que representa’l 66 % del total. Esti ye’l balance del procesu qu’empezó’l 15 de xunu y acabó’l 17 d’agostu, pol que les alministraciones local y autonómica llograron el permisu d’estes persones pa que’l Gobiernu central xestione directamente la so solicitú de la renta estatal.

El procedimientu aforró a los usuarios cargues burocrátiques, como se comprometiere meses atrás la conseyera de Derechos Sociales y Bienestar, Melania Álvarez. Los perceptores que nun dieren el preste nesti periodu van tener que realizar agora la tramitación a títulu particular nes canales habilitaes pol Institutu Nacional de la Seguridá Social (INSS).

Depués del llabor desenvueltu poles entidaes locales, el Gobiernu del Principáu trabaya intensamente pa unviar primero del 15 de setiembre’l ficheru colos datos de los espedientes que cumplan los requisitos riquíos pol INSS. Esti ye’l plazu dau pol gobiernu estatal pa que les solicitúes s’acepten y se tramiten con efectu retroactivu de 1 de xunu. L’Alministración central dispón de trés meses pa resolver los espedientes recibíos.

Álvarez recordó que les persones que cobren el salariu social van siguir percibiéndolu hasta que se resuelvan les sos solicitúes. Amás, si la cuantía que-yos reconocieren na prestación nacional fore inferior a l’autonómica, van garantiza-yos qu’algamen l’importe del salariu social.

N’Asturies hai rexistraes 22.219 families que perciben el salariu social básicu. La previsión ye que la mayoría pasen a cobrar l’ingresu mínimu vital, anque’l Principáu va caltener l’ayuda autonómica p’aquellos colectivos que queden escluyíos de la renta estatal, como ye’l casu de les persones con pensiones non contributives, les mayores de 65 años que vivan soles o les unidaes familiares que lleven conviviendo menos d’un añu.

Información sobre el documento

© Copyright 2006. Gobiernu del Principau d'Asturies