Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Gobiernu d’Asturies va desarrollar del 10 al 24 de mayu la ...
 

Actualidá

El Gobiernu d’Asturies va desarrollar del 10 al 24 de mayu la campaña institucional d’ información de les elecciones autonómiques

El presupuestu de llicitación d'esta iniciativa asítiase en 29. 000 euros. El conseyeru de Presidencia compareció güei na diputación permanente de la Xunta Xeneral, a pidimientu propiu, pa informar sobre'l procedimientu. Nel Principáu tienen derechu al votu 973. 738 persones, de les que 855. 873 moren n'España y 117. 865 nel estranxeru

23/04/2019

El Gobiernu d'Asturies va desenvolver del 10 al 24 de mayu la campaña d'espardimientu sobre los comicios autonómicos del día 26, coincidiendo col ámbitu temporal de la mesma campaña electoral. El conseyeru de Presidencia y Participación Ciudadana informó güei sobre esti procesu nuna comparecencia, a pidimientu propiu, na diputación permanente de la Xunta Xeneral del Principáu.

La información va espublizase, ente otros, en medios de comunicación de titularidá pública - en cumplimientu de la normativa vixente y al igual que na convocatoria de 2015-, concretamente en Radio Televisión del Principáu d'Asturies (RTPA) y nos programes de desconexón territorial de Radio Televisión Española. L'Executivu dirixióse tamién a los conceyos pa que puedan incluyir los anuncios, con calter gratuitu, en medios de comunicación municipales, y hasta el momentu confirmaron la so collaboración una ventena de conceyos.

L'importe de llicitación de la campaña ye de 29.000 euros (ensin IVA) y ente les novedaes destaca que la llicitación realizóse por aciu procedimientu abiertu simplificáu y l'incorporación de cambeos nos criterios de valoración de les ufiertes, acordies con la Llei de Contratos del Sector Públicu.

Tres l'aprobación del pliegu de clauses alministratives y la finalización del plazu de recepción d'ufiertes, el 12 d'abril, la mesa de contratación axuntó'l día 15 y almitió les cuatro ufiertes presentaes, cuidao que toes elles cumplen les condiciones esixíes nos pliegos. Les empreses que presentaron propuestes pa desenvolver la campaña son Bittia, Impact 5, Publiestrategia S.L. y Eteria Publicidá, Marketing y Comunicación S.L. y los sos planteamientos pa la creatividá contienen los siguientes elementos:

   - Anunciu pa prensa escrita en dalgún de los tamaños habituales pa esti tipu de formatu: páxina completa, media páxina, robapáxines o faldón.
   - Propuesta d'anunciu de televisión de 25 segundos de duración.
   - Testu con propuesta de cuña de radiu de 25 segundos de duración.
   - Propuesta d'anunciu pa internet y redes sociales.
   - Propuesta d'imaxe para mupis (soportes publicitarios instalaos n'elementos de moblame urbanu).

Amás del conceptu creativu, la so calidá, orixinalidá ya impactu visual, ente los criterios d'axudicación de la campaña informativa incorpórase l'espardimientu de los mensaxes en redes sociales.

La perspectiva de xéneru ye un preceptu que se salvaguardó especialmente en tol procesu. Asina, va esixise a la empresa axudicataria una declaración responsable que garantice, mientres la execución del contratu, la igualdá ente homes y muyeres nel tratu, l'accesu al empléu, la clasificación profesional, la promoción, la permanencia, la formación, les retribuciones y l'estabilidá llaboral, ente otros requisitos. Coles mesmes, ente los criterios sociales de desempate ente dos o más ufiertes va tener en cuenta'l mayor porcentaxe de muyeres emplegaes en cada plantiya.



Principales datos y feches del procesu electoral

N'Asturies tienen derechu al votu 973.738 persones (14.300 menos que nos comicios autonómicos de 2015), de les cualos 855.873 moren n'España y 117.865 nel estranxeru, según los últimos datos del censu electoral publicaos pol Institutu Nacional d'Estadística (INE).

Acordies con el calendariu electoral, el Boletín Oficial del Principáu (Bopa) va publicar mañana, día 24 d'abril, les candidatures presentaes. Per otra parte, l'espardimientu de sondeos electorales podrá realizase hasta'l 21 de mayu.

Otres feches relevantes rellacionaes cola xornada electoral del día 26 son les siguientes:

   - Votu per corréu. El 16 de mayu ye l'últimu día pa presentar la solicitú.
   - Votu accesible. Beneficia a les persones con discapacidá visual igual o superior al 33% que remanen el sistema braille. Van poder solicitalo hasta'l 29 d'abril nel teléfonu gratuitu 900 150 000.
   - Votu pa residentes nel estranxeru o temporalmente ausentes. El 21 de mayu ye la fecha llímite pa que les persones que figuren nel Censu Electoral de Residentes Ausentes (CERA) puedan emitir el sufraxu. Esta vegada, pueden facelo per dos víes: per corréu o n'urna nos respectivos consulaos o llugares dispuestos pa tal fin. Los residentes ausentes que prefieran votar n'urna han entregar en persona los sobres y documentos oportunos nes oficines o secciones consulares que-yos correspuendan pola so inscripción, o nos llugares designaos pa tal fin, ente'l 22 y el 24 de mayu

Tola información relativa al procedimientu d'axudicación de la campaña institucional del 26-M puede consultase nel perfil del contratante de la web del Gobiernu d'Asturies https://bit.ly/2wt9xcgy la referida a les elecciones a la Xunta Xeneral en https:// asturias. infoelecciones.es

 

Información sobre el documento

© Copyright 2006. Gobierno del Principado de Asturias