Gobierno del Principado de Asturias

Asturias, mucho más cerca

Estás en

Asturias.es Temas Salud La revista New Medical Economics concede a la Finba’l so premiu ...
 

Salud

La revista New Medical Economics concede a la Finba’l so premiu al Desenvolvimientu de la Investigación

La publicación valora’l trabayu d’escelencia de la fundación, el so apueste pol averamientu de la comunidá científica a la sociedá y el fomentu d’una innovación responsable

22/10/2018

La revista líder na difusión de conteníos de xestión sanitaria, New Medical Economics, concedió a la Fundación pa la Investigación Biosanitaria del Principáu d’Asturies (Finba) el premiu al Desenvolvimientu de la Investigación que da anualmente.

Los editores y llectores d’esta publicación especializada valoren el compromisu de la Finba cola investigación d’escelencia, el llabor tan intensu d’averamientu de la comunidá científica a la sociedá y el fomentu d’una investigación y innovación responsables, como clave pal desenvolvimientu económicu y el progresu d’Asturies.

La Finba ye una iniciativa de la Conseyería de Sanidá onde participen la Universidá y el Conceyu d’Uviéu y que cunta con un sofitu fuerte y desinteresáu del sector empresarial priváu al traviés de Cajastur-Liberbank, Corporación Alimentaria Peñasanta S.A. (Capsa), Fundación Alimerka, Fundación Caja Rural, Fundación EDP, Grupo Kiss FM, Grupo TSK, Industrias Lácteas Asturianas S.A., el Grupo Pérez Simón y Transinsa Ambulancias de Asturias, que constituyen el patronatu de la fundación.

Amás, ye la estructura de xestión del Institutu d’Investigación Sanitaria del Principáu (Ispa), agrupáu alredor del Hospital Universitariu Central d’Asturies (HUCA). Tamién opera como ferramienta de xestión de la investigación, el desenvolvimientu y la innovación (I+D+i) de tolos centros sanitarios dependientes del Serviciu de Salú del Principáu (Sespa), con un trabayu centráu na meyora de l’asistencia sanitaria, los pacientes y la salú de la población en xeneral.

La xestión del conocimientu, les polítiques de propiedá intelectual, les patentes, la cooperación con sociedaes d’inversión y la captación de capital simiente y capital riesgu súmense a les xeres habituales de la Finba pa configurar y adecuar el so marcu d’actividá.

Amás, p’averar la comunidá científica a la sociedá, la fundación fomenta una investigación y innovación responsables, qu’allinia los procesos y resultaos de la I+D+i coles necesidaes y oxetivos de la población. Pa eso, sofita la participación ciudadana activa, la igualdá de xéneru, la educación, la ética y integridá científica, l’accesu abiertu a la información y la responsabilidá compartida d’instituciones pa la gobernanza de la Finba y del Ispa.

El premiu va dase esti 7 de payares, a les 17 hores, nel Ministeriu de Sanidá.

 

 

Información sobre el documento

© Copyright 2006. Gobierno del Principado de Asturias