Gobierno del Principado de Asturias

Asturias, mucho más cerca

Estás en

Aniciu Gobiernu Actualidá L’Hospital Vital Álvarez Buylla impulsa un cuartu de simulación ...
 

Actualidá

L’Hospital Vital Álvarez Buylla impulsa un cuartu de simulación pa favorecer l’entrenamientu de los profesionales

La metodoloxía d’aprendimientu basada na práctica supón beneficios pa sanitarios y pacientes. Medicina Preventiva pon en marcha una unidá de vacunes qu’incluye una consulta virtual collaborativa d’inmunización pa personal médico y d’enfermería del área de Mieres

d'esquierda a derecha, Bernabé Fernández, responsable de Calidá de la Conseyería de Sanidá; María Fernández de Prada, xefa de Serviciu de Medicina Preventiva del área VII; María José Zapico, enfermera de Medicina Preventiva; Gracia Valcárcel, técnica de calidá del área; Pía Giménez, directora d'Atención Sanitaria del área, y Carlos Díaz, xefe de la unidá de Calidá

23/04/2019

L’Hospital Vital Álvarez Buylla de Mieres, cabecera del área sanitaria VII, creó un área d’entrenamientu basáu na simulación que va valir p’ameyorar la práctica de determinaes técniques y impulsar la capacitación de los profesionales. Pa eso, va utilizase la reproducción d’actos como ferramienta docente, con metodoloxíes basaes nel análisis de les esperiencies, cola mira d’ameyorar la seguranza de los pacientes.

Asina, nun cuartu real del hospital, dotáu con distintos equipamientos, incluyíu un simulador, van recrease práctiques rellacionaes con situaciones clíniques como la hixene de manos, el tratamientu de pacientes con bacteries multirresistentes o’l manexu de dispositivos invasivos. Nesta contorna, los profesionales van poder llevar alantre los sos conocimientos y habilidaes pa resolver les situaciones que se-yos presenten. Amás, van ameyorar la so maña nel desempeñu de distintes técniques.

La puesta en marcha d’esti espaciu ye un compromisu de la xerencia del área del Caudal cola formación y l’actualización de conocimientos de los profesionales sanitarios. La iniciativa busca, al traviés de la simulación, reforzar les sos habilidaes técniques y competencies necesaries pa ufiertar el meyor serviciu a la ciudadanía.

Esta metodoloxía d’aprendimientu supón beneficios pa profesionales y pacientes, porque encurtia’l tiempu necesariu p’ameyorar la práctica, dexa enquivocase ensin repercusiones reales, facilita la reproducción de contornes poco comunes nel desempeñu del llabor sanitariu y aplícase en toles etapes del desenvolvimientu educativu de los especialistes.

Con esta iniciativa, el serviciu de Medicina Preventiva y Salú Pública y la Unidá de Docencia del área VII impulsen la estratexa del cambéu na educación médica, al apostar pola simulación clínica como ferramienta de formación y reciclaxe.



Consultes virtuales collaboratives

Otra de les novedaes que se punxeron en marcha na zona del Caudal ye una consulta presencial de vacunes pa grupos de riesgu, como por exemplu pacientes a tratamientu con quimioterapia, persones tresplantaes o enfermos de VIH.

Al amparu d’esta iniciativa creáronse, amás, consultes virtuales collaboratives, qu’al traviés d’elles el serviciu de Medicina Preventiva va dar respuesta a cualquier pregunta o dulda que presente’l personal facultativo y d’enfermería.

 

Información sobre el documento

© Copyright 2006. Gobierno del Principado de Asturias