Gobiernu del Principau d'Asturies

Asturies, muncho más cerca

Tas en

Asturias.es Muyeres El Gobiernu d’Asturies recuerda que los servicios d’atención a ...
 

Muyeres

El Gobiernu d’Asturies recuerda que los servicios d’atención a les víctimes de violencia de xéneru siguen activos nel aislamientu pol coronavirus

18/03/2020

El Gobiernu d’Asturies recuerda a la ciudadanía que los servicios específicos d’atención a víctimes de violencia de xéneru van permanecer activos tol tiempu que dure l’aislamientu pol coronavirus. La Dirección Xeneral d’Igualdá y l’Institutu Asturianu de la Muyer caltienen una coordinación constante y permanente colos servicios y recursos d’atención a víctimes de violencia de xéneru.

La directora xeneral d’Igualdá, Nuria Varela, anima a familiares y vecindariu a qu’avisen énte situaciones de violencia: “Precisamos más implicación de les redolaes cercanes a la hora de denunciar p’acabar coles situaciones de maltratu. El confinamientu ye un escenariu terrible pa les víctimes de violencia de xéneru, quíta-yos de romper cola situación y amás alimenta la sensación d’impunidá de los agresores. Nun tenemos que consentilo. Énte la violencia de xéneru nun podemos facer oyíos sordos nin mirar pa otru llau”.

Los recursos de que se disponen son estos:

  • Los 16 Centros Asesores de la Muyer (CAM) repartíos pel Principáu atienden telemáticamente toles urxencies que se presenten. Recuérdase que si nun ye posible tener una conversación telefónica, hai tamién correos electrónicos pa comunicase colos centros y númberos móviles a los que pue unviase un whatsapp anque nun correspuendan a la zona onde se vive. Lo importante ye avisar énte cualquier situación de riesgu.
  • La Rede de Cases d’Acoyida funciona les 24 hores con servicios mínimos del personal d’atención directa. La coordinación de la rede tamién ta disponible les 24 hores, amás del teléfonu d’ingresos por derivación urxente de profesionales. Ta preparáu un informe de continxencia por si fore menester ampliar les places.
  • Los equipos d’atención psicosocial a la muyer de los servicios de salú mental de les ocho árees sanitaries atienden los casos d’urxencia, bien telemáticamente o con asistencia directa en situación de crisis.
  • Los colexos d’abogacía d’Uviéu y Xixón caltienen el serviciu de guardia pal turnu d’oficiu específicu pa violencia de xéneru.
  • Les unidaes de valoración forense integral d’Uviéu y Xixón cunten con un psicólogu y un trabayador social en situación de disponibilidá. Nel casu de les oficines d’asistencia a víctimes (Uviéu, Xixón y Avilés) hai una persona del cuerpu de xestión como servicios mínimos por caúna.

Icono gráfico alusivo al tipo de archivo Llista de teléfonos (Pdf: 72 Kb) (n'español)

Información sobre el documento

© Copyright 2006. Gobiernu del Principau d'Asturies