Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía La SRP sofita a Fuensanta na incorporación de tecnoloxíes ...
 

Industria y enerxía

La SRP sofita a Fuensanta na incorporación de tecnoloxíes d’Industria 4.0 y la reducción de la buelga de carbonu

Concede un empréstamu participativu de 1,5 millones pa la renovación de tola llinia de fabricación de vidru y pa llograr que la empresa algame nel 2022 l’oxetivu de cero emisiones. La operación, la más importante de la Sociedá Rexonal de Promoción anguaño, respalda una inversión de 3,8 millones que va dexar crear 12 puestos de trabayu nuevos. La sociedad zarra’l 2019 cola concesión de 4. 525. 000 euros de financiación a nueve proyectos empresariales que suponen una inversión total inducida de 13 millones

Los empresarios José Miguel Fernández Rodríguez y José Luis Fernández Martín-Caro, de Global SMM 2009 S.L, con Eva Pando, presidenta de la SRP, y Javier Merino, notario de Oviedo, durante la formalización de la operación el 18 de diciembre

20/12/2019

La Sociedá Rexonal de Promoción (SRP) aprobó la concesión d’un empréstamu participativu de 1,5 millones d’euros a la sociedá Global SMM 2009, propietaria de la marca Fuensanta. La operación, la más importante realizada anguaño pola entidá de capital riesgu y de promoción económica participada mayoritariamente pol Gobiernu del Principáu, va dexar a la compañía’l desenvolvimientu d’un proyectu de medría y eficiencia enerxética onde va invertir 3,8 millones d’euros col compromisu de creación de doce puestos de trabayu nuevos.

La operación foi formalizada esta selmana pola presidenta de la SRP, Eva Pando, y polos socios de Global SMM 2009, los empresarios José Miguel Fernández Rodríguez y José Luis Fernández Martín-Caro.

Fuensanta va llevar a cabu nos dos años vinientes la renovación de tola so llinia de fabricación de vidru con tecnoloxía Industria 4.0 cola mira d’incorporar al mercáu productos saludables nuevos. Amás, prevé una mengua importante de la buelga de carbonu gracies a un menor consumu enerxéticu y d’eficiencia industrial, coles mires de consiguir emisiones cero nel añu 2022. D’esta manera, va poner nel mercáu envases ecolóxicos 100 % reforzando’l compromisu medioambiental, siendo la única empresa asturiana d’agua con certificación ISO 14001 de xestión medioambiental.

El proyectu de Fuensanta xunta dellos factores que lu faen especialmente interesante p’Asturies: innovación tecnolóxica, sostenibilidá medioambiental, desenvolvimientu de productos saludables nuevos y creación d’empléu.

Fuensanta incorpórase asina a la cartera de la Sociedá Rexonal de Promoción, que totaliza con esta sociedá nueva 47 empreses con una inversión d’alredor de 52 millones d’euros.

Con esta operación d’empréstamu participativu, la SRP zarra l’añu 2019 con 4.525.000 euros de financiamientu aprobáu pa nueve proyectos empresariales que suponen una inversión total inducida de 13 millones y la creación de 50 nuevos puestos de trabayu. Cuatro d’estos proyectos correspuenden a empréstamos participativos concedíos a empreses innovadores y tecnolóxiques dientro de la llinia ‘Medría Entamadores Innovadores’. Con estes son yá 22 les iniciatives d’entamadores innovadores sofitaos pola SRP de magar se punxo en marcha esta llinia a últimos del 2013, con una inversión total aprobada de 2,8 millones d’euros, una inversión inducida de 8 millones y una creación de 158 puestos de trabayu.

SRP ye una sociedá anónima participada mayoritariamente pol Gobiernu del Principáu d’Asturies qu’opera nel mercáu del capital riesgu y qu’actúa como organismu de promoción económica dende 1984. La so actividá consiste n’impulsar el desenvolvimientu de proyectos d’inversión executaos por empreses asturianes, pente medies de dos instrumentos financieros: la participación nel so capital social o la concesión d’empréstamos, principalmente participativos.

Información sobre el documento

© Copyright 2006. Gobiernu del Principau d'Asturies