Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu Infraestructures nel Principáu La Conseyería d'Infraestructures va contratar los nuevos ...
 

Infraestructures nel Principáu

La Conseyería d'Infraestructures va contratar los nuevos proyectos d'obres en llevantándose l'estáu d'alarma

El vicepresidente sorraya que mientres el confinamientu realizáronse tolos trámites alministrativos de les actuaciones presupuestaes pa esti añu. Los trabayos en carreteres y les iniciatives de suministru y saneamientu d'agües, suspendíes mientres la envernía económica, tán executándose agora con normalidá. El Principáu va unviar el documentu para la desescalada al Gobiernu central alredor del 8 de mayu

27/04/2020

El vicepresidente y conseyeru d'Infraestructures, Mediu Ambiente y Cambéu Climáticu, Juan Cofiño, manifestó güei que mientres la crisis sanitaria viéronse afectaes les obres en fase de contratación y aquelles que riquen pa la so execución de la previa ocupación de terrenos. Sicasí, indicó que toes elles van reponer el so ritmu n’acabando l'estáu d'alarma, yá que’l so departamentu trabayó “intensamente mientres esti períodu”, con cuenta de, en recuperándose la nueva normalidá, “la tramitación alministrativa tea concluyida pa contratar los proyectos pendientes”.

Cofiño, que compareció a pidimientu propiu nel grupu de trabayu de la Xunta Xeneral pal siguimientu de la COVID-19, indicó que tolos trabayos n'execución de carreteres y de saneamientu y suministru d'agües “siguen el so cursu ensin nenguna incidencia reseñable”, tres el periodu d'envernía decretáu pol Gobiernu central ente'l 30 y el 12 d'abril pa contener la pandemia.



Calidá del aire

Referente al control de la calidá del aire, que funcionó como serviciu esencial, Cofiño destacó l'ameyoramientu xeneralizáu, n'Asturies, n'España y nel mundu”, que se produció de resultes de la cayida de l'actividá económica y de la movilidá.

Nel Principáu, el dióxidu de nitróxenu (NON2), el contaminante más directamente venceyáu al tráficu per carretera, amenorgóse de media un 35% mientres el periodu d'alarma frente a la primera quincena de marzu, y delles estaciones mididores rexistraron un descensu superior al 62%.

Pela so parte, les PM10 (partícules en suspensión menores de 10 micres), rellacionaes cola actividá industrial y con determinaos fenómenos meteorolóxicos como les intrusiones de polvu sahariano o los aerosoles marinos, baxaron un 27% de media.

Respectu al bencenu, el conseyeru remarcó que la lexislación vixente establez un valor llende añal de 5 microgramos por metro cubico, y que dende'l 1 de xineru “el promediu ye de 1,6 microgramos per metro cúbicu, bien per debaxo de los topes referíos”. Anguaño, la conseyería y el Conceyu de Xixón tán diseñando un plan especial pa la zona oeste del conceyu.

Amás, Cofiño añedió que'l próximu branu prevése presentar l'estudiu qu'ellabora l'Institutu de Salú Carlos III sobre l'allugamientu de les estaciones de midida de la calidá del aire, interrumpíu mientres l'estáu d'alarma. “Pretendemos acabar con cualesquier elucubración al respective de la eficacia de los mididores pola so situación”, sorrayó.



Residuos hospitalarios

De resultes de la crisis, los residuos infecciosos sanitarios aumentaron un 307% y espérase qu'esti mes se recueyan 135.000 kilogramos procedentes de los hospitales. Por esta razón, Coxersa amplió tanto'l númberu de trabayadores como'l d'hores d'incineración d'esti material, col fin d'ufiertar el serviciu nes máximes condiciones de seguridá. “Les instalaciones del consorciu nun s'enllenaron en nengún momentu y disponen entá del 35% de capacidá adicional”, sorrayó'l conseyeru.



Tresporte y movilidá

La xestión de la conseyería en materia de tresporte empobinóse a convertir la restricción de la movilidá en “una ferramienta pa contener el virus”, según detalló Cofiño. Les midíes adoptaes tradúcense nun amenorgamientu d'usuarios del tresporte públicu que ronda'l 90%.

El descensu ye especialmente vultable nos trayectos interprovinciales per cualesquier mediu de tresporte, con un amenorgamientu superior al 80%. La mayoría d'estos desplazamientos, según esplicó'l vicepresidente, realícense en vehículu priváu, polo que se pasó d'una media de 14.400 places diaries d'entrada y de salida a menos de 200, lo que supón una ufierta un 98,6% inferior a la d'un día ordinariu. “Esto ye, el zarru del tresporte públicu interprovincial ye prácticamente un fechu”, aseveró.

En materia económica, aprobóse'l pagu anticipáu de les subvenciones de débil tráficu a les empreses concesionaries de servicios de tresporte regular, con una partida de 2 millones dirixida a desaniciar la falta d'ingresos del sector.



Desescalada

Per otra parte, el vicepresidente informó a la Xunta Xeneral sobre la constitución del comité formáu por once espertos de distintes disciplines qu'asesoren al Gobiernu d'Asturies na ellaboración del plan pa la recuperación gradual de la normalidá. Esti grupu, lideráu pol mesmu Juan Cofiño, nútrese de les directrices del equipu técnicu presidíu pol conseyeru de Salú y de la documentación pescanciada de distintos sectores económicos y los axentes sociales y económicos.

El documentu final va treslladase al Conseyu de Gobiernu pa la so remisión y negociación col Executivu central, alredor a los díes 7 o 8 de mayu, apuntó Cofiñoo. Nesti sentíu, incidió en que'l procesu de desescalada “va realizase siguiendo les directrices xenerales emanaes del Gobiernu d'España, en función de criterios epidemiolóxicos”. “El procesu va ser lleal y collaborativu pa vencer al virus y recuperar la normalidá na vida cotidiana”, detalló.



Violencia de xéneru

Perotru llau, el conseyeru informó de que les primeres actuaciones nel ámbitu de la llucha contra la violencia de xéneru empobinaes a asegurar el control del virus na rede de cases d'acoyida, onde nun se detectó nengún casu positivu. La Dirección Xeneral d'Igualdá distribuyó material de protección en tolos recursos y punxo en marcha un protocolu pa nuevos ingresos.

Tamién s'entamó y reforzó tola rede asistencial (incluyíos los 16 centros asesores de la muyer), y ampliáronse les canales de comunicación pa les víctimes, con teléfonos móviles, correos electrónicos y servicios de mensaxería electrónica que se sumen a los habilitaos pola Delegación del Gobiernu n'Asturies.

La Rede de Cases d'Acoyida reforzóse cola apertura d'una nueva casa provisional pa muyeres que tienen qu'abandonar les sos cases y púnxose en marcha otru pisu pa víctimes de trata.

“L'oxetivu ye que'l confinamientu nun agrave la violencia de xéneru y que toles muyeres que la precisen sepan que pueden salir de les sos cases y cuntar cola protección y el sofitu que rican”, sorrayó'l conseyeru. Anguaño, moren na rede 168 persones: 82 muyeres y 86 fíos y fíes.

Información sobre el documento

© Copyright 2006. Gobiernu del Principau d'Asturies