Gobiernu del Principau d'Asturies

Asturies, muncho más cerca

Tas en

Asturias.es Temes Cultura Promoción, Cooperación y Difusión Cultural Asturies va presidir el grupu de trabayu del Conseyu Xacobéu ...
 

Promoción, Cooperación y Difusión Cultural

Asturies va presidir el grupu de trabayu del Conseyu Xacobéu para readaptar la programación cultural de Xacobéu 21

L'organismu va sopelexar una encuesta ente los sectores implicaos na xestión del Camín de Santiago pa conocer con detalle la situación actual de la vía y recibir les sos propuestes

04/05/2020

El Gobiernu d'Asturies va presidir, al traviés de la Dirección Xeneral de Cultura y Patrimoniu, el grupu de trabayu del Conseyu Xacobéu encargáu d'analizar y readaptar la programación cultural de Xacobéu 21. Asina lo decidió güei la comisión executiva del organismu n'una xunta celebrada por videoconferencia na que participó'l director xeneral de Cultura y Patrimoniu, Pablo León.

Nel alcuentru, alcordóse analizar tola programación cultural de Xacobéu 21, que yá fuera aprobada, cola cuenta de valorar la so adecuación a l'actual situación. De la mesma, el grupu de trabayu va estudiar la posibilidá d'incorporar nuevos programes culturales, tamién en formatu dixital, que permitan caltener activa la celebración del próximu Añu Santu, independientemente de les restricciones de la movilidá, agora a valir.

El Conseyu Xacobéu, máximu órganu de coordinación del Camín de Santiago, abordó la situación actual de la ruta tres l'impactu provocáu pola COVID-19 y les consecuencies de la emerxencia sanitaria. Tamién decidió empecipiar el procesu de torna a la normalidá na vía xacobea, al traviés d'un comité que va coordinar los trabayos hasta la so reapertura y la de toles sos infraestructures; n'especial, los albergues de pelegrinos.

Esti grupu de trabayu va sopelexar nos próximos díes una encuesta ente tolos sectores implicaos na xestión de la ruta xacobea (asociaciones d'amigos, albergueros, axentes turísticos…) col fin de conocer con detalle la realidá de la vía y les propuestes de cara a la so reapertura.

Información sobre el documento

© Copyright 2006. Gobiernu del Principau d'Asturies