Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural El programa De itinerarios por el patrimonio amplía la so ...
 

Patrimoniu Históricu y Cultural

El programa De itinerarios por el patrimonio amplía la so ufierta con percorríos accesibles por Llaboral y el cascu históricu d'Avilés

El Principáu va ufiertar diez rutes culturales dende'l sábadu 11 de xineru hasta'l mes de mayu. Un total de 495 persones participaron nesta iniciativa dende la so puesta en marcha en setiembre de 2018

02/01/2020

El Gobiernu d'Asturies va poner en marcha'l sábadu 11 de xineru la tercer edición del programa D'itinerarios pel patrimoniu, qu'ente xineru y mayu de 2020 va ufiertar visites per diez rutes culturales y naturales del Principáu coles mires de dar más visibilidá y facilitar l'accesu de los visitantes al patrimoniu asturianu.

Los percorríos son guiaos, cunten con una duración de media xornada o día completu ya inclúin serviciu de tresporte n'autobús con salida y llegada n'Uviéu. Un total de 495 persones participaron nes 29 salíes programaes dende la puesta en marcha de la iniciativa, en septiembre de 2018.

La novedá del programa pa 2020 ye la inclusión d'un itinerariu accesible por Llaboral, Ciudá de la Cultura en Xixón y pol cascu históricu d'Avilés, que va permitir afayar el patrimoniu cultural de la rexón a participantes con algun tipu de discapacidá intelectual, física y sensorial auditiva o visual.

Les entraes pa participar nes rutes de xornada completa tienen un preciu de 18 euros o de 15 pa públicu infantil de 4 a 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d'Asturies. Pa los itinerarios de media xornada'l preciu xeneral ye de 15 euros y amenorgáu de 12 euros.

Les localidaes pueden adquirise presencialmente nes oficines de Curin Servicios Integrales de Turismu, de llunes a vienres n'Uviéu, y al traviés de la web www.hazteunbus.es



Recorríos y feches del programa

La programación de D'itinerarios pol patrimoniu arrinca'l 11 de xineru con un percorríu que va llevar a los visitantes a descubrir la rica redolada cultural del Camín de Santiago nel occidente asturianu, con paraes n'A Veiga, Taramundi y Grandas de Salime, ente otres localidaes. Tamién na zona occidental asturiana, les persones participantes van poder esfrutar de la guapura de dalguna de les villes marineres que señalen la mariña asturiana colos sos cascos antiguos, los sos puertos, les sos playes y cantiles.

El programa inclúi, amás, dellos percorríos pol prerrománicu asturianu d'Uviéu y L.lena, que permiten visitar los monumentos de Santa María del Naranco y San Miguel de Lliño n'Uviéu y la ilesia de Santa Cristina de L.lena; y una segunda ruta pol prerrománicu d'Uviéu y Valdediós, con paraes na ilesia de Santuyano de los Praos y na Fonte de Foncalada n'Uviéu y nel monesteriu de Santa María en Valdediós.

El públicu va poder participar amás n'itinerarios pol oriente asturianu nos que se van visitar les cueves con arte rupestre d'El Pindal y Tito Bustillo o siguir la Ruta de les Pelegrinaciones con paraes en Cuadonga y Cangues d'Onís. Tamién se van poder descubir distintos puntos d'interés del patrimoniu industrial de Mieres y Llaviana con visites al pobláu mineru de Bustiello y una ruta de senderismu industrial que transita per La Pola Llaviana y llega a llugares tan emblemáticos como los pozos Carrio y Barredos.

A lo último, la iniciativa inclúi visites a la Reserva Natural Integral de Muniel.los, la mayor carbayera d'España y una de les meyor calteníes d'Europa; y al Parque Natural de Somiedu, una ruta na que van podese contemplar les famoses cabanes de teitu d'escoba y visitar el Muséu de les Cases de Veigas.



Les feches de los percorríos son les siguientes:

Xineru:

  • Día 11: Camín de Santiago.
  • Día 18: Parque Natural de Somiedu.
  • Día 21: Cuadonga, ruta de las pelegrinaciones.

Febreru:

  • Día 1: Prerrománicu asturianu: Uviéu y Valdediós.
  • Día 8: Prerrománicu asturianu: Uviéu y L.lena.
  • Día 15: Pueblos marineros.
  • Día 22: Reserva Natural Integral de Muniel.los.
  • Día 29: Patrimoniu industrial.

Marzu:

  • Día 14: Camín de Santiago.
  • Día 21: Parque Natural de Somiedu.
  • Día 28: Itinerariu accesible: Llaboral Ciudad de la Cultura y Avilés cascu históricu.

Abril:

  • Día 4: Patrimoniu industrial.
  • Día 11: Prerrománicu asturianu: Uviéu y L.lena.
  • Día 18: Reserva Natural Integral de Muniel.los.
  • Día 25: Pueblos marineros.

Mayu:

  • Día 2: Arte rupestre pel oriente.
  • Día 9: Cuadonga, ruta de las pelegrinaciones.
  • Día 16: Camín de Santiago.
  • Día 23: Prerrománicu asturianu: Uviéu y Valdediós.
  • Día 30: Parque Natural de Somiedu.

Información sobre el documento

© Copyright 2006. Gobiernu del Principau d'Asturies