Gobiernu del Principau d'Asturies

Asturies, muncho más cerca

Tas en

Asturias.es Temes Ganadería El programa nuevu de xestión del llobu del Principáu incluye ...
 

Ganadería

El programa nuevu de xestión del llobu del Principáu incluye controles de población pa evitar que los ataques comprometan les esplotaciones ganaderes

Los últimos datos, correspondientes al 2018, amuesen que n’Asturies hai unos 40 grupos familiares d’estos cánidos, una cifra que se caltuvo estable nel últimu llustru

Un momento de la reunión

26/09/2019

El conseyeru de Desenvolvimientu Rural, Agroganadería y Pesca, Alejandro Calvo, y el director xeneral de Mediu Natural, David Villar, presentaron güei el programa de xestión del llobu pal periodu 2019-2020, que prevé controles de población ellí onde la presencia d’estos cánidos comprometa la viabilidá económica de les esplotaciones agropecuaries, cola mira d’amenorgar los daños na mayor midida posible.

El testu nuevu, que se dio a conocer nel comité consultivu del Plan de Xestión del Llobu, da cumplimientu al plan vixente, qu’obliga a ellaborar programes anuales y define los cupos d’estracción calculaos pa cada zona de presencia habitual y pal conxuntu de la esporádica. Estes llendes pónense a tenor de los datos poblacionales recoyíos, la evolución del númberu de daños y el grau de conflictividá social, lo mesmo que de la disponibilidá de posibles preses monteses y los métodos qu’hai qu’usar en cada casu.

El documentu aspira a caltener la especie nel contestu xeográficu de la población noroccidental ibérica y llevar a cabu una xestión favorable a los intereses de los habitantes de territorios que puedan vese afectaos, tanto cola mengua de daños como al traviés de la compensación económica naquellos casos en que se produzan, buscando fórmules que faigan entainar la tramitación alministrativa.

Anguaño, la población calculao de llobos nos ciclos naturales del 2017 y 2018 ye, respectivamente, de 41 y 40 menaes o grupos familiares, cifres que se caltienen estables dende va un llustru.

Tocante a los daños, menguaron pasu ente pasu dende’l 2014, añu nel que s’algamó un máximu de 4.645 reses afectaos. Nel 2017 foron 3.839 y nel 2018, 3.317. La especie más perxudicada sigue siendo la equina, como n’años anteriores, siguida de la ovina.



Actuaciones previstes

El programa d’actuaciones pal 2019-2020 establez un cupu máximu d’estracción de 42 exemplares. En concreto, pon estos cupos pa cada zona de xestión: noroccidental (5), El Palu-Esva (6), suroccidental (6), Centroccidental (7), central (6), centroriental (8) y Los Picos (4). Nesta postrera esclúyese’l territoriu del Parque Nacional de los Picos d’Europa, que cunta col so propiu programa de control, deriváu de la so llexislación específica, y que se va realizar nel marcu de la coordinación interautonómica.

Les zones de xestión son aquelles onde ye habitual la presencia de grupos reproductores de llobu. Existen otres árees onde l’apaición d’exemplares y la so posible reproducción ye esporádica. Nestes postreres, el control va desenvolvese permanentemente y ensin llimitación de cupu, cola mira de caltener el so estatus actual como zona de dispersión esporádica.

Tamién se presentaron nel comité consultivu les llinies nueves d’actuación y criterios de valoración de les bases reguladores que van rexir la concesión d’ayudes pa la prevención de daños a la ganadería. Ta previsto que se publiquen primero de fin d’añu y suponen una meyora importante al respective de les anteriores, porque s’afaen a la casuística y circunstancies de la cabaña ganadera en réxime estensivu.

La Conseyería de Desenvolvimientu Rural va analizar agora toles aportaciones al plan realizaes na xunta polos miembros del comité.

 

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies