Gobiernu del Principau d'Asturies

Asturies, muncho más cerca

Tas en

Asturias.es Temes Pesca El Gobiernu d'Asturies crea un grupu de trabayu para impulsar el ...
 

Pesca

El Gobiernu d'Asturies crea un grupu de trabayu para impulsar el relevu xeneracional nel sector pesqueru

Busca facilitar l'accesu a l'actividá y promover el desenvolvimientu de la carrera profesional. El Principáu convocó'l primer procesu de acreditación de competencies pa Operaciones en tresporte marítimu y pesca de baxura

17/07/2020

El conseyeru de Mediu Rural y Cohesión Territorial, Alejandro Calvo, anunció güei en Xixón la creación d'un grupu de trabayu pa impulsar el relevu xeneracional nel sector pesqueru asturianu. Con esta iniciativa “pretendemos poner la bases que nos permitan antemananos a una situación que n'unos años puede ser problemática, pola xubilación de numberosos marineros y patrones de pesca qu'anguaño integren la nuestra flota, amás d'atender a la necesidá d'adaptar la formación marítimo-pesquera a les necesidaes actuales de formación y promoción de los nuestros profesionales”, esplicó.

Calvo realizó esti anunciu mientres la so participación nun alcuentru con representantes del sector a los que se presentó esti grupu, que va tar baxo la dirección del director xeneral de Pesca Marítima, Francisco González, y que se va encargar d'analizar les necesidaes d'estos profesionales y de coordinar el trabayu de toles alministraciones con competencies n'ordenación pesquera y formación.

Ente los sos oxetivos tán el d'evitar que se pierda la esperiencia acumulada polos patrones pesqueros que se van xubilar nos próximos años y tamién facilitar l'accesu de los marineros a titulaciones necesaries pal exerciciu del so oficiu. Unu de los mayores problemes ye la falta de tripulantes que puedan cumplir colos requisitos esixíos pola lexislación marítima.

Poro, una de les primeres iniciatives que va realizar esti grupu ye'l desenvolvimientu d'un nuevu marcu normativu pal accesu a les titulaciones marítimo-pesqueres de competencia autonómica como les de marineru pescador, patrón local de pesca y patrón costeru polivalente. Trátase d'adaptar la normativa a la realidá actual de la formación y a les mesmes necesidaes del sector pa que puedan compatibilizar la formación col trabayu na mar.

Precisamente, Asturies yá convocó'l primer procesu d’ acreditación de competencies (PEAC) pa la cualificación profesional Operaciones en tresporte marítimu y pesca de baxura. Ta dotáu con cien places y nestos momentos ta abiertu'l plazu pa la presentación de solicitúes. Esti procesu va permitir a tolos candidatos que tengan la titulación de Patrón Local de Pesca y qu'acrediten la esperiencia y competencia necesaries, promocionar escontra la titulación de Patrón Costeru Polivalente y ampliar asina les sos atribuciones profesionales.

Per otra parte, nuna rexón con gran tradición marítima, resulta tamién importante facilitar la carrera profesional na mar y la pesca a toos aquellos mozos que deciden vocacionalmente dirixir la so vida profesional escontra esti sector. Por ello, otru de los oxetivos del grupu de trabayu ye la implantación de la formación profesional dual na pesca, una y bones la posibilidá de l'alternanza de la formación ente'l centru y los barcos, convertir nun mecanismu esencial que cumple coles necesidaes actuales de la formación marítima.

Al alcuentru celebráu güei asistieron, amás, el director xeneral de Pesca Marítima, Francisco González; l'alcaldesa de Xixón, Ana González; el director del Centru Integráu de FP del Mar, Indalecio Estrada, y el presidente de la Federación de Confreríes de Pescadores d'Asturies Adolfo García.

Información sobre el documento

© Copyright 2006. Gobiernu del Principau d'Asturies