Gobiernu del Principau d'Asturies

Asturies, muncho más cerca

Tas en

Asturias.es Emigrantes El Principáu destina 60.000 euros a un programa d’asistencia ...
 

Emigrantes

El Principáu destina 60.000 euros a un programa d’asistencia sanitaria pa mayores de la colectividá asturiana en Venezuela

L’Executivu y la Fundación España Salú van firmar un conveniu que garantiza l’atención médica y la prestación farmacéutica a persones de 65 años o más en situación de necesidá

15/09/2019

El Gobiernu d’Asturies, al traviés de la Conseyería de Presidencia, va firmar llueu un conveniu cola Fundación España Salú pa impulsar un programa d’asistencia sanitaria destináu a mayores de la colectividá asturiana en Venezuela. El Principáu va apurrir a esta entidá 60.000 euros cola mira d’ufiertar atención médica, quirúrxica y prestación farmacéutica a persones de 65 o más años que s’atopen en situación de necesidá, nun tengan seguru médicu y nun perciban prestación económica.

La subvención va valir pa dar asistencia primaria, al traviés de les consultes de medicina interna de la fundación, atención especializada ambulatoria, asumir los gastos d’hospitalización y ciruxía, y facilitar ayuda médica domiciliaria cuando la situación del paciente lo rica. Tamién se van reembolsar servicios médicos yá contrataos y van cubrise gastos rellacionaos colos fallecimientos de les persones beneficiaries (velatoriu, inhumación o cremación).

La Fundación España Salú ye una entidá con personalidá xurídica propia, ensin fines d’arriquecimientu y con domiciliu fiscal en Venezuela, que’l so oxetivu principal ye ufiertar una atención completa de salú a les persones emigrantes españoles.

Esta iniciativa forma parte de los programes desenvueltos pol Principáu en favor de la población asturiano en Venezuela y de los sos descendientes, a los que se destinó más d’un millón dende’l 2012 pa garantizar l’asistencia sanitaria, amás d’ayudes individuales y sofitu económicu a les persones retornaes a Asturies.

L’Executivu trata de remediar asina la situación tan grave que pasen les 5.224 persones que, según los últimos datos oficiales, integren la colectividá asturiana nel país. La crisis afecta en mayor midida a families con menores d’edá y a los alredor de 2.000 mayores de 65 años que proceden del Principáu.

 

Información sobre el documento

© Copyright 2006. Gobiernu del Principau d'Asturies