Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Gobiernu d’Asturies aprueba un decretu qu’ evita a los ...
 

Actualidá

El Gobiernu d’Asturies aprueba un decretu qu’ evita a los pacientes adelantar el pagu de les prestaciones ortoprotésiques

Van Poder retirar les prótesis nos establecimientos incluyíos nel rexistru d'entidaes collaboradores y el Serviciu de Salú va abonar directamente'l so costu. Esta midida beneficia especialmente a neños y mozos que precisen audífonos y moldes adaptadores. El Sespa va financiar dende agora los gastos de mantención y desplazamientu del acompañante de cualesquier menor que tenga de sometese a una prueba o tratamientu fuera del Principáu

07/04/2019

El Gobiernu d'Asturies aprobó esta selmana un decretu que regula les prestaciones ortoprotésiques y de desplazamientu y mantención, que la so principal novedá ye la creación del rexistru d'establecimientos collaboradores, que va evitar que los usuarios tengan qu'adelantrar el pagu y solicitar darréu'l so reintegro al Serviciu de Salú del Principáu (Sespa).

En virtú d'esta normativa, que sustitúi a la que taba a valir dende 2003, los pacientes nun van tener qu'abonar les prestaciones ortoprotésiques prescrites polos sos facultativos ya incluyíes na cartera básica del Sistema Nacional de Salú. D'equí p'arriba, van poder retirales ensin mediar pagu dalgunu nes ortopedies, a les qu'el Sespa va pagar directamente.

Esta midida afecta especialmente a los menores de 16 años con hipoacusia que precisen ayudes para l'audición y que les sos families teníen qu'adelantrar l'eleváu importe de los audífonos y los moldes adaptadores. Tamién se van beneficiar del cambéu aquelles persones que precisen otru tipu de prótesis o ortoprótesis, como sielles de ruedes, muletes, calzáu o ayudes para la prevención de úlceras por presión.

Amás, el decretu reconoz el derechu de los beneficiarios a optar llibremente ente dambos procedimientos: el nuevu d'abonu directo per parte del Sespa o'l tradicional de reintegro de gastos, de manera que los recursos económicos de les families nun van suponer una torga pal accesu a estes prestaciones.

Otra de les midíes incluyíes na nueva norma ye l'ampliación de la edá del paciente que'l so acompañante tien derechu al financiamientu de los gastos de desplazamientu y mantención, per parte del Sespa, cuando sía necesariu'l treslláu a otra comunidá pa realizar pruebes, consultes o tratamientos. Hasta agora, namás se cubríen estos costos nel casu d'acompañantes de neños d'hasta 14 años, edá qu'agora s'amplía hasta los 18.

Les razones de equidad qu'inspiren el nuevu decretu aconseyen elevar la edá de referencia, de cuenta que les ayudes beneficien al acompañante de cualesquier paciente menor d'edá, como asocede anguaño na mayor parte de les comunidaes autónomes.

 

Información sobre el documento

© Copyright 2006. Gobierno del Principado de Asturias