Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El Principáu caltien activa la campaña d'entrampiu de l'aviespa ...
 

Actualidá

El Principáu caltien activa la campaña d'entrampiu de l'aviespa asiática en collaboración con conceyos y voluntariáu

La Dirección Xeneral del Mediu Natural habilita un procedimientu pa que les entidaes locales espidan permisos al personal collaborador mientres l'estáu d'alarma. La plataforma Avisap rexistraba a 31 de marzu 3.792 trampes asitiaes, más que tola campaña de la primavera pasada

07/04/2020

El Gobiernu d'Asturies, en collaboración con conceyos y voluntariáu, caltien activa mientres l'estáu d'alarma la campaña d'entrampiu de primavera de l'aviespa asiática, principal midida de llucha contra esta especie invasora. D'esta miente, garantízase la continuidá de los trabayos, que tienen por oxetu aumentar les captures de reines.

Pa ello, la Dirección Xeneral del Mediu Natural habilitó un procedimientu que permite a les entidaes locales espedir permisos específicos de circulación, con una serie de condiciones y compromisos, al personal que collabora con esta iniciativa. Asina, los voluntarios pueden revisar les trampes, camudar l'atrayente y vaciales.

La campaña d'entrampiu primaveral va estendese primeramente hasta xunu y la so duración va venir determinada poles condiciones climátiques y la bioloxía de la especie, que va ser evaluada pol grupu d'espertos que formen parte del comité asesor del plan d'actuación pa la detección y control de la vespa velutina.

El comité calificó d'esencial l'entrampiu primaveral d'esta especie na so xunta ordinaria de febreru, cola fin d'apangar los efectos negativos sobre la flora y la fauna, y cumplir colos oxetivos marcaos. Tamién alcordó reforzar la collaboración coles asociaciones sectoriales y los conceyos, estos postreros encargaos de designar a los responsables municipales que yá trabayen en coordinación directa con personal técnicu de la Conseyería de Desenvolvimientu Rural, Agroganadería y Pesca.

El director xeneral del Mediu Natural, David Villar, destacó'l llabor que tán desenvolviendo les entidaes locales y les persones voluntaries, de la que resaltó la implicación d'estos colectivos, especialmente pervalible nel momentu actual de crisis sanitaria.



Rexistru de datos en Avisap

La plataforma Avisap, na que se rexistren les trampes asitiaes contra l'aviespa asiática y les captures de reines d'esta especie, reflexaba a 31 de marzu la instalación de 3.792 trampes, una cifra superior a la del zarru de la campaña de primavera de 2019, qu'algamó les 3.609.

D'últimes, prindáronse 7.260 exemplares d'aviespa asiática, de les que 6.657 yeren reines.

Tocantes a la distribución territorial de les trampes, Avisap confirma que l'allugamientu llega a la mayoría de los conceyos, magar ye mester esperar a que los conceyos xunten tolos datos sobre les actuaciones realizaes pa cuntar con una radiografía completa de la situación. Esta información, la única base de datos completa y oficial, va ser de gran ayuda pa la futura toma de decisiones sobre la especie.

Avisap va ufiertar información actualizada cada mes y puede consultase nel siguente enllaz de la web del Principáu:

https://cutt.ly/avispon_asiatico_asturias


Icono gráfico alusivo al tipo de archivo Trampeo avispa asiática (Pdf: 784 Kb)
Icono gráfico alusivo al tipo de archivo Audiu (Audiu: 785 Kb) (n'español)

Información sobre el documento

© Copyright 2006. Gobiernu del Principau d'Asturies