Gobiernu del Principau d'Asturies

Asturies, muncho más cerca

Tas en

Asturias.es Temes Salú El Gobiernu d’Asturies prohíbe la consumición en barra dende la ...
 

Salú

El Gobiernu d’Asturies prohíbe la consumición en barra dende la medianueche en tolos establecimientos d'hostelería

La norma afita les 2 de la madrugada como hora máxima de zarru pa restoranes, chigres de copes y discoteques, y encamienta el rexistru de clientes y usuarios nestos negocios. El Bopa va publicar güei la resolución, que tien por oxetivu evitar biltos de coronavirus énte la relaxación nes midíes de seguridá, especialmente na nueche

29/07/2020

El Conseyu de Gobiernu dio güei el vistu bonu a la prohibición de consumición en barra dende la medianueche n'establecimientos d'hostelería y restauración, discoteques y chigres de copes. Dende esa hora, namás se va permitir el serviciu en meses. Amás, afita les 2 de la madrugada como hora máxima de zarru nel sector, que nun va poder almitir nuevos clientes dende les 1:30 hores.

El Principáu adopta esta midida énte la relaxación ya incumplimientu de les midíes de seguridá y de distanciamientu social detectáu especialmente na madrugada, lo qu'incrementa’l riesgu de biltos de covid-19.

Esta midida va incluyise como apartáu 8.3. del capítulu VIII Condiciones pa la prestación del serviciu nos establecimientos d'hostelería, restauración y ociu nocherniegu de la resolución del 19 de xunu de 2020, de midíes urxentes de prevención, contención y coordinación necesaries pa facer frente a la crisis sanitaria causada pol nuevu coronavirus.



Rexistru de veceros

La decisión del Executivu, que se va publicar güei mesmo nel Boletín Oficial del Principáu (Bopa), encamienta al sector hosteleru qu'ellabore un rexistru de clientes y usuarios nel que conste nome y/o apellíos, fecha, y hora d'accesu y salida, previu consentimientu del interesáu. Esti rexistru, que tendrá de caltenese un mes, va ser pa usu esclusivu de la Dirección Xeneral de Salú Pública pa facilitar el rastrexu y siguimientu de contactos de casos positivos o sospechosos de coronavirus.

Esti encamientu inclúyese como apartáu 3.4 del capítulu III Midíes en materia de control de riesgos y llimitaciones d'aforu, del anexu de la resolución del 19 de xunu mentada enantes.

Les autoridaes sanitaries recuerden a los ciudadanos la obligatoriedá d'utilizar mázcara y la importancia de guardar una distancia interpersonal de, polo menos, un metro y mediu con persones coles que nun se convive. Tamién encamienten la llavadura frecuente de manes.

Información sobre el documento

© Copyright 2006. Gobiernu del Principau d'Asturies