Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies promovió la creación de 30 empreses ...
 

Aniciu

El Gobiernu d’Asturies promovió la creación de 30 empreses innovadores l’añu pasáu

El Centru Européu d'Empreses d'Innovación recueye na so memoria añal el sofitu emprestáu a 58 compañíes nel llogru de 2,3 millones de financiación. El Principáu asítiase 23 puntos pencima de la media nacional tocantes a la supervivencia de propuestes empresariales novedoses

27/05/2020

El Gobiernu d'Asturies facilitó la creación de 30 compañíes innovadores l'añu pasáu y ufiertó apoyu pal llogru de financiación en proyectos empresariales a otres 58. Estos son dalgunos de los principales datos que presentó güei el Centru Européu d'Empreses ya Innovación (CEEI) na xunta añal de los sos órganos de gobiernu, na que participó'l director xeneral d'Innovación, Investigación y Tresformación Dixital, Iván Aitor Lucas.

La memoria del centru, presentada en videoconferencia pola so directora, Cristina Fanjul, revela cifres positives al respective de les empreses centraes nel sector de la innovación y creaes col sofitu del CEEI. Asina, el 64% d'estes firmes tien un índiz de supervivencia superior a los 5 años, de manera qu'Asturies asítiase 23 puntos pencima de la media nacional nesti indicador.

De la trentena de compañíes creaes en 2019, doce enmárquense nel sector de les empreses de base tecnolóxica (EBTs). Amás, el CEEI emprestó asesoramientu a entamadores con iniciatives innovadores, ayudó a definir los sos modelos de negociu, de forma individualizada, pa la so puesta en marcha. Polo que respecta a proyectos empresariales, el CEEI sofitó a 58 empreses a consiguir 2,25 millones de financiamientu.

Ente les iniciatives desenvueltes el pasáu añu destaquen programes d'aceleración sectorial n'árees como la bioeconomía y la salú o la movilidá sostenible; mesmo que programes d'innovación abierta, nos que grandes empreses tractores cooperen cola redolada empresarial pa desarrollar proyectos innovadores. En total, rexistráronse más de 300 interacciones ente grandes y pequeñes compañíes.



Más de 25 años de trayectoria

El CEEI cumplió 25 años nel pasáu exerciciu, y dende la so puesta en marcha, atendió a 12.945 entamadores, trabayó con 6.860 proyectos y facilitó la creación de 1.684 empreses. Nos últimos años caltuvo un ritmu sosteníu añal de puesta en marcha d'una decena d'empreses de base tecnolóxica, hasta completar anguaño una comunidá de 210 firmes.

Coincidiendo con esti balance añal, el CEEI tamién informó a los miembros de la so xunta de gobiernu sobre la puesta en marcha d'una nueva páxina web (https://www.ceei.es/) con conteníu anovao y meyores na accesibilidá, pa cumplir colos estándares actuales. Camuda tamién el diseñu del portal pa facelu más modernu y facilitar la visibilidá y l'accesu a tolos programes.

Información sobre el documento

© Copyright 2006. Gobiernu del Principau d'Asturies