Gobierno del Principado de Asturias

Asturias, mucho más cerca

Estás en

Aniciu Gobiernu Actualidá Sanidá edita una guía sobre l’ictus p’ayudar a pacientes, ...
 

Actualidá

Sanidá edita una guía sobre l’ictus p’ayudar a pacientes, familiares y cuidadores en toles etapes de la enfermedá

L’oxetivu del proyectu ye favorecer la reincorporación a la vida activa de les persones que sufren un accidente cerebrovascular. El trabayu presentóse güei nel HUCA xunto a un videu qu’esplica cómo actuar énte la sospecha d’infartu cerebral

d'esquierda a derecha, Luis Miguel Jiménez, formador del programa Paciente Activu Asturies (Pacas); Roberto Riaño, fisioterapeuta del HUCA; Sergio Calleja, neurólogu, y Carmen Gómez, enfermera de Neuroloxía del HUCA

23/04/2019

La Conseyería de Sanidá publicó la guía Preguntes y respuestes sobre l’ictus. Escuela de cuidaos, destinada a les persones que sufrieron un ictus, pero que tamién val d’orientación pa familiares y cuidadores. Esti trabayu tan ambiciosu recueye la información necesaria pa facilitar la incorporación de los pacientes a la vida cotidiana na midida na que los dexen les secueles de la enfermedá.

Amás, el documentu busca facilitar a les sos persones más averaes los conocimientos necesarios al respective de los cuidaos y la forma más afayadiza de dar ayuda, amás d’información sobre los recursos a la so disposición.

Hasta’l momentu distribuyéronse cuasi 2.000 exemplares en papel de la guía, fundamentalmente ente usuarios y especialistes d’atención primaria y de los hospitales. Amás, la publicación ta disponible nesti enllaz:

https://www.astursalud.es/documents/31867/0/2018_10_26+guia+ictus.pdf/b7f39241-2d5b-37cd-9cc9-16061c0d528a

El xerente del Serviciu de Salú del Principáu (Sespa), José Ramón Riera, presentó güei la guía a les asociaciones de pacientes y equipos de rehabilitación nun actu celebráu n’Hospital Universitariu Central d’Asturies (HUCA). “Trátase d’una ayuda esencial pa encarar los problemes que surden na vida diaria y consiguir la meyor adaptación a la situación nueva col mayor grau d’autonomía y independencia posible nes actividaes cotidianes”, esplicó.

Esti trabayu ye tamién una ferramienta bien útil pa conocer la enfermedá, los factores de riesgu y les sos consecuencies, amás de p’ayudar a la población a actuar énte la sospecha d’ictus. Pa eso, pon un énfasis especial na identificación de los síntomes de principiu y les acciones que tien que realizar cualquier persona nesta situación.



Videu esplicativu

Cola mira de reforzar estos mensaxes, ellaboróse un videu qu’amuesa d’una manera bien gráfica cómo reconocer los síntomes principales del ictus y qué facer énte la sospecha.

Un nutríu grupu de profesionales de la sanidá pública realizó’l trabayu. L’equipu tuvo integráu pola enfermera Beatriz del Amor, del Serviciu de Neuroloxía del HUCA; Sergio Calleja, neurólogu del mesmu serviciu; Bernabé Fernández, médicu del área de calidá de la Dirección Xeneral de Planificación Sanitaria; Margarita Fernanz, coordinadora de Trabayu Social del Área Sanitaria IV; María del Carmen Gómez, enfermera xestora de casos de Neuroloxía del HUCA; María Jesús González, médica de la Dirección Xeneral de Planificación Sanitaria; María Neri Iglesias Fernández, trabayadora social sanitaria de la Conseyería de Sanidá; María Isabel Prieto, subdirectora d’enfermería del HUCA, y Roberto Riaño Suárez, fisioterapeuta del serviciu de Rehabilitación del HUCA.

La guía ye una pieza del engrane tan complexu qu’esixe l’atención al ictus, onde s’implica un equipu multidisciplinar de profesionales d’atención primaria, hospitalaria, emerxencies y servicios sociales. La publicación complementa’l Programa d’educación sanitaria nel ictus, qu’apurre conocimientos y habilidaes pa caltener la salú y prevenir la recayida de los pacientes.

La Unidá del Ictus púnxose en marcha nel 2008 y cada añu atiende a más de 500 pacientes. Nos más de los casos, tanto de la que tán hospitalizaos como nel momentu del alta, los enfermos y los sos familiares formulen munches duldes y mieos al personal sanitario que los asiste.

 

   Icono gráfico alusivo al tipo de archivo Guía Ictus (Pdf: 1 Mb) (n'español)

Información sobre el documento

© Copyright 2006. Gobierno del Principado de Asturias