Gobiernu del Principau d'Asturies

Asturies, muncho más cerca

Tas en

Asturias.es Temes Pesca El Gobiernu d'Asturies participa nunes xornaes divulgatives ...
 

Pesca

El Gobiernu d'Asturies participa nunes xornaes divulgatives sobre l'angula a les que van asistir un centenar de profesionales

L'alcuentru, qu'empieza mañana en Xixón, va analizar la situación d'esta especie y les acciones p'ameyorar la so conocencia. La Dirección Xeneral de Pesca Marítima va incorporar dellos drones pa reforciar la llucha contra'l furtivismu y la pesca illegal

24/10/2019

El Gobiernu d'Asturies participa al traviés de Redepesca —la rede que s'estableció ente l'Alministración, el sector pesqueru y dellos organismos científicos de la rexón— na organización de les xornaes divulgatives La angula en Asturias: investigación y pesca. Al alcuentru van asistir alredor d'un centenar de profesionales.

L'oxetivu ye dar a conocer la situación de les poblaciones d'angula, asina como divulgar los estudios científicos y acciones realizaes na década última pola Dirección Xeneral de Pesca Marítima en collaboración con otros departamentos del Principáu y la Universidá d'Uviéu.

Les xornaes empiecen mañana con delles meses redondes y ponencies dirixíes al públicu en xeneral que van desenvolvese nel Acuariu de Xixón. La xornada del sábadu, que va tener llugar na casa la cultura de L'Arena, va tar dirixida a profesionales. A lo llargo d'estos dos díes, científicos, pescadores y técnicos de l'Alministración van debatir y van intercambiar conocencies sobre la especie.

Anguaño tán desenvolviéndose delles acciones dirixíes a consiguir la recuperación de l'angula y a garantizar una pesquería sostenible, incluyíos paros biolóxicos. Arriendes d’ello, una campaña más el Gobiernu d'Asturies va destinar ayudes públiques a los armadores d'angula pa compensa-yos pola paralización de l'actividá.

La llucha contra'l furtivismu ye otau de les exes prioritaries. Con esti propósitu, la Dirección Xeneral de Pesca Marítima va incorporar dellos drones p'ameyorar la vixilancia. Púnxose en marcha tamién una campaña especialmente centrada na angula y el percebe. Asina, el serviciu de vixilancia pesquera va intensificar la collaboración col Seprona y la Guardia Civil del Mar tanto nes actuaciones na mariña como nos controles de tresportes per carretera.

Redepesca ye un instrumentu de participación de los axentes rellacionaos colos recursos marinos, lo mesmo que d’intercambiu y tresferencia d'información y conocencies ente'l sector pesqueru, la comunidá científica y l'Alministración del Principáu d'Asturies. Encárgase de recoyer datos, realizar actividaes de xestión, estudios, proyectos pilotu, divulgación de conocencies y resultancies d'investigaciones, desenvolvimientu de seminarios y meyores práctiques nel sector de la pesca.

Nesta rede participen la Dirección xeneral de Pesca Marítima, el Centru de Centru d'Esperimentación Pesquera, l'Observatoriu Marín d'Asturies (OMA), l'Institutu de Recursos Naturales y Ordenación del Territoriu (INDUROT), el Centru Oceanográficu de Xixón, el Serviciu Rexonal d'Investigación y Desenvolvimientu Agroalimentariu del Principáu d'Asturies (SERIDA), la Federación de Confraderíes de Marineros del Principáu d'Asturies (FECOPPAS), colectivos del sector pesqueru artesanal de les confraderíes de pescadores, el colectivu de los/les mariscadores/as a pie, l'Asociación de Rederes de baxura d'Asturies, Grupos d'Acción Local de Pesca d'Asturies (ríu Eo, Navia-Porcía, Entrecabos, Baxu Nalón, Cabu Peñes, Llastres-Punta del Olivo y Oriente) y el Centru Integráu de Formación Profesional del Mar.

   Icono gráfico alusivo al tipo de archivo Programa (Pdf: 475 Kb) (n'español)

Información sobre el documento

© Copyright 2006. Gobiernu del Principau d'Asturies