Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El Principáu destina 172.777 euros a trés obres urxentes pa ...
 

Información de los Conceyos

El Principáu destina 172.777 euros a trés obres urxentes pa remediar los efectos del últimu temporal n’oriente

La Conseyería de Presidencia va financiar la reparación d’una muria en San Xuan de Beleño qu’amenaza con esbarrumbar y de dos caminos cortaos n’Amieva y Piloña

29/12/2019

La Conseyería de Presidencia va destinar 172.777 euros a financiar trés intervenciones n’oriente asturianu pa remediar los efectos del temporal d’agua rexistráu en payares.

En dos de los casos van concedese subvenciones a los conceyos de Piloña y Amieva pa qu’executen les obres d’emerxencia, mentes que la tercera, que se va llevar a cabu en Ponga, va realizala directamente la conseyería al traviés de la empresa pública Tresformaciones Agraries S. A. (Tragsa).

Esta última actuación va consistir en reponer la muria de sostenimientu d’un camín interior en San Xuan de Beleño por importe de 91.407 euros. Parte d’esta muria, allugáu nel accesu a una residencia pública d’ancianos na parte cimera del llugar, argayó de resultes del temporal y, de nun intervenir rápido, podría provocar daños.

El muriu presenta estroces importantes a lo llargo d’unos 30 metros, lo que resulta una amenaza pa les edificaciones asitiaes debaxo d’él. Na actualidá, la zona ta desapolinada y señalizada pa evitar la presencia de persones na redolada de la cayida de les piedres.

En Piloña, la conseyería va conceder una subvención de 38.680 euros al conceyu pa correxir un argayu nel camín d’accesu a la población de Moru. Nesta zona y por cuenta del agua que cayó va poco, producióse una fana de la lladera, na zona conocida como La Foz del Moru. El puntu ta señalizáu y balizáu, y el tráficu faise pela parte de la calzada ensin afectar. La inestabilidá del terremplén que sofita la carretera actual y l’avance progresivu del argayu obliguen al so arreglu urxente.

P’acabar, n’Amieva, el Principáu va subvencionar al consistoriu con 42.690 euros pa financiar l’arreglu del camín que xunta los llugares de Cirieñu y Arnañu, onde’l temporal d’agua provocó un argayu de la lladera sobre esti vial que corta la comunicación ente estes dos localidaes de la parroquia de Sebarga al altor d’El Camperón.

Información sobre el documento

© Copyright 2006. Gobiernu del Principau d'Asturies