Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El to Conceyu El Principáu abre una ronda de contactos con conceyos y axentes ...
 

El to Conceyu

El Principáu abre una ronda de contactos con conceyos y axentes sociales pa esplicar el tresvase del salariu básicu al ingresu mínimu vital

La conseyera Melania Álvarez solicita collaboración a los conceyos pa entainar trámites a les persones beneficiaries. El ministeriu asume la solicitú del Principáu y amenorga la carga burocrática por aciu un consentimientu por escritu

03/06/2020

El Gobiernu d'Asturies empecipió güei una ronda de contactos colos conceyos, que va prosiguir colos axentes sociales, pa estenar duldes ya informar sobre'l procesu de tresvase de los beneficiarios del salariu social básicu (SSB) escontra l'ingresu mínimu vital (IMV).

La conseyera de Derechos Sociales y Bienestar, Melania Álvarez, celebró una xunta, acompañada pola directora xeneral de Xestión de Derechos Sociales, Paula Álvarez, cola Comisión de Servicios Sociales de la Federación Asturiana de Conceyos (FACC), na que solicitó a los conceyos la so collaboración pa entainar trámites y evitar la carga burocrática a los perceptores de la renta mínima na etapa de transición ente prestaciones.

“Punximos en marcha'l procesu pa qu’aquelles persones que tengan derechu a cobrar el IMV empiecen a recibir la prestación nos próximos meses, ensin más trámite qu'emprestar el so consentimientu per escritu”, esplicó Álvarez. La conseyería solicitó espresamente esti sistema al Ministeriu d'Inclusión, Seguridá Social y Migraciones n'abril y finalmente foi incluyíu na llei, lo que va dexar allixerar la xestión alministrativa.

Pa la mayoría de les persones que cobren el salariu social n'Asturies, el IMV va ameyorar los sos ingresos. Van quedar exentos de cobrar l'ayuda estatal y van caltenese sol paragües de la prestación autonómica los mayores de 65 años y aquelles unidaes familiares que lleven conviviendo menos d'un añu.

“Esti Gobiernu siempre defendió que nun va dexar a naide tras, por ello, como diximos dende'l principiu, dambes prestaciones van convivir”, esplicó la conseyera. Amás, añedió que l'oxetivu ye empezar cuanto primero la primer fase, que va tener una duración aproximada de trés meses. N’esi tiempu, va pescanciase’l consentimientu de los beneficiarios, bien per parte d'aquellos conceyos que decidan collaborar nesta xera, bien dende la mesma conseyería. D'esta miente, va conocese cuántes persones van pasar al IMV y cuántes van siguir percibiendo'l SSB.

Anguaño, n'Asturies cobren el salariu social básicu 22.175 persones.

Información sobre el documento

© Copyright 2006. Gobiernu del Principau d'Asturies