Gobiernu del Principau d'Asturies

Asturies, muncho más cerca

Tas en

Asturias.es Temes Consumu L’Axencia de Consumu impulsa una campaña pa detectar práctiques ...
 

Consumu

L’Axencia de Consumu impulsa una campaña pa detectar práctiques comerciales deslleales mentes ye l’estáu d’alarma

Los compradores tienen derechu a la devolución del preciu de los bienes o servicios non disfrutaos

07/04/2020

L’Axencia de Seguranza Alimentaria, Sanidá Ambiental y Consumu empezó una campaña de vixilancia de precios pa controlar la so evolución y evitar posibles práctiques comerciales deslleales mentes ye la situación escepcional xenerada pol estáu d’alarma.

Nesti sentíu, Consumu ta realizando una monitorización diaria de precios de dellos artículos d’alimentación, bebíes, productos y bienes de primer necesidá, productos hixénicos, droguería, parafarmacia y equipos tecnolóxicos y de telecomunicaciones.

La campaña, que se desenvuelve en collaboración col Ministeriu de Consumu, pon una atención especial a les práctiques comerciales deslleales detectaes na venta d’equipos de protección individual (guantes, mázcares y xel hidroalcohólico).

Amás, tamién efectúa un siguimientu particular a los precios de los servicios funerarios, que nun van poder ser más altos que los vixentes enantes del 14 de marzu del 2020. Amás, primero de la contratación del serviciu, la funeraria tien que facilitar un presupuestu detalláu de tolos servicios y axuntar una llista de los precios enantes de la declaración del estáu d’alarma. Nel so casu, la empresa funeraria que cobrare de más va tner que volvelo.



Derechos de los consumidores

Énte esta situación escepcional, el Gobiernu central aprobó una partida de midíes pa protexer a los consumidores énte los problemes que pueda causa-yos la situación escepcional: cancelaciones de vuelos, viaxes turísticos, eventos deportivos, espectáculos o la suspensión de l’actividá de ximnasios o academies.

Nel casu de los viaxes n’avión, el consumidor va tener derechu a cancelar el vuelu ensin penalización. La compañía pue ufierta-y una alternativa de vuelu y, si nun se llega a un alcuerdu nel plazu de 60 díes, va tener que-y rembolsar la cantidá pagada. Tocante a les reserves d’hoteles o otros eventos como espectáculos o pruebes deportives que nun puedan realizase na fecha prevista, adóptense les mesmes midíes.

Nos servicios de calter periódicu (ximnasiu, academies o escueles infantiles, ente otros servicios), el prestador va poder ufiertar la opción de disfrutar más alantre de les actividaes o rebaxar l’importe abonáu nes cuotes futures. Si’l veceru nun acepta l’alternativa propuesta, van volvese les perres. Amás, les empreses nun van poder cobrar más cuotes hasta que nun se vuelva entamar el serviciu.



Moratoria nel pagu d’hipoteques y creitos al consumu

Les persones que perdieren l’empléu o sufrieren una perda d’ingresos o de facturación de polo menos el 40 % van poder solicitar la suspensión del pagu de la so hipoteca o creitu al consumu.

Amás, ta prohibíu’l corte de suministru d’agua, lluz y gas a estos consumidores vulnerables o en riesgu d’esclusión social.



Bienes non entregaos

Los consumidores qu’adquirieren un bien que nun puedan recibir, van poder solicitar la resolución del contratu nun plazu de 14 díes. Sicasí, la empresa tien la opción d’ufiertar una solución alternativa (fecha distinta d’entrega o un vale sustitutoriu) que’l comprador ha tener qu’aceptar. Si trescurríos 60 díes nun hubo alcuerdu, la empresa va volver les perres.

L’Axencia de Seguranza Alimentaria, Sanidá Ambiental y Consumu actualiza na so páxina web (www.consumoastur.es ) les midíes de protección de les persones consumidores, amás de recomendaciones y conseyos útiles pa estos momentos tan escepcionales.


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies