Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Artesanía Camín d’un centenar d’artesanos espón los sos trabayos na feria ...
 

Artesanía

Camín d’un centenar d’artesanos espón los sos trabayos na feria de Navidá qu’entama la Conseyería d’Industria

El certame, que va tar abiertu al públicu hasta’l 5 de xineru n’El Campo San Francisco d’Uviéu, quier impulsar la proyección d’esti sector. El director xeneral de Comerciu y Turismu, Julio González Zapico, entregó güei los premios del concursu de Pieza Única

El director xeneral de Comerciu y Turismu, Julio González Zapico (segundu pela derecha), xunto a les premiaes Cecile Brillet y María Teresa Lorences (teniendo pelos diplomes) y los demás miembros del xuráu

22/12/2016

La feria d’artesanía Rosaleda d’Artesanos, que cada añu entama la Conseyería d’Empléu, Industria y Turismu, acueye la obra de camín d’un centenar de profesionales, 18 d’ellos procedentes d’otres comunidaes autónomes. Con esti eventu, el Principáu quier impulsar la comercialización de les principales manufactures artesanes.

El director xeneral de Comerciu y Turismu, Julio González Zapico, visitó esta mañana la feria, asitiada nel paséu de La Rosaleda d’El Campo San Francisco d’Uviéu, y participó na entrega de los gallardones del decimoséptimu concursu de pieza única, al que se presentaron 18 obres.

El primer premiu ganólu Cecile Brillet, pola so obra Sueños de viento, y el segundu, María Teresa Lorences Riesgo, pola so pieza Joyero. Los gallardones consisten nun premiu en metálico de 1.500 y 1.000 euros, respectivamente, amás d’un diploma acreitativu.

Nel casu del primer premiu, el xuráu valoró la orixinalidá y el tratamientu del color de la obra ganadora. En cuantes al segundu premiu, destacó que la pieza recueye la tradición asturiana de les arquetes de castañal y carbayu, creando una obra d’alta calidá artística.

La feria, allugada nuna carpa de 1.120 metros cuadraos, va permanecer abierta hasta’l 5 de xineru.

Información sobre el documento

© Copyright 2006. Gobiernu del Principau d'Asturies