Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El Gobiernu d’Asturies trabaya nuna estratexa de refuerzu ...
 

Actualidá

El Gobiernu d’Asturies trabaya nuna estratexa de refuerzu p’acabar cola llista d’espera en discapacidá

Derechos Sociales define una fueya de ruta pa encarar les demorances, partiendo del análisis de cada centru de valoración. El Principáu propón volver a la simplificación del baremu pa que’l procesu entaíne en toles comunidaes. La Conseyería va dar prioridá a casos graves, peticiones de menores d’edá y solicitantes de tarxeta d’estacionamientu

15/09/2020

El Gobiernu d’Asturies trabaya nuna estratexa de refuerzu p’acabar cola llista d’espera nes valoraciones de los espedientes de discapacidá. La conseyera de Derechos Sociales y Bienestar, Melania Álvarez, esplicó güei na Xunta Xeneral qu’esti determín tomóse desque se realizó un estudiu pormenorizáu de cada centru de valoración. Asina, namás tener les conclusiones, diseñóse una fueya de ruta nueva pa encarar les demorances.

“Los plazos d’espera de los que falamos, que se vieron agravaos de resultes de la crisis sanitaria, superen en munchos casos l’añu, pero esta conseyería nun queda nel llamentu, sinón qu’encara los problemes y busca soluciones”, destacó Álvarez.

La estratexa nueva incluye estes llinies d’actuación:


  • El refuerzu de los recursos humanos nos centros de valoración d’Avilés y Uviéu.
  • Priorizar les solicitúes de valoración de menores de 18 años, solicitantes de pensión non contributiva o prestación por fíu a cargu.
  • Priorizar les solicitúes d’ayudes o subvenciones non permanentes; esto ye, que tán condicionaes a plazos.
  • Tamién van entainar los espedientes de persones que la so situación seya grave o que precisen d’un recursu urxente; por exemplu, un agospedamientu residencial.
  • Van tener prioridá los procedimientos abiertos, yá seya per vía xudicial o alministrativa, vinculaos a la violencia de xéneru y que puedan vese afectaos pola reconocencia del grau de discapacidá.
  • Tamién se van adelantar los trámites de persones solicitantes de la tarxeta d’estacionamientu de vehículos que tresporten a persones con movilidá menguada.

La titular de Derechos Sociales indicó que les demorances nes llistes de discapacidá n’Asturies son “asemeyaes a les d’otres comunidaes autónomes”, polo que resulta necesaria una solución global. Nesti sentíu, anunció que la selmana que vien, na comisión delegada del Conseyu Territorial de Servicios Sociales y del Sistema pa l’Autonomía y l’Atención a la Dependencia, va proponer que se retome la revisión de la normativa, especialmente “de los aspectos rellacionaos cola simplificación de la xestión y los procedimientos de valoración”.

Información sobre el documento

© Copyright 2006. Gobiernu del Principau d'Asturies