Gobiernu del Principau d'Asturies

Asturies, muncho más cerca

Tas en

Asturias.es Temes Seguridá pública Seguridá ciudadana Los efectos del temporal obliguen a suspender les clases en más ...
 

Seguridá ciudadana

Los efectos del temporal obliguen a suspender les clases en más d’una ventena de centros educativos, la mayoría nel valle del Nalón

Los conceyos más afectaos pola paralización de l’actividá llectiva son Samartín del Rei Aurelio, Llangréu y Llaviana. La escuela pública y l’institutu de Les Arriondes siguen zarraos poles llenes qu’hubo ayeri. N’hospital del oriente namás sigue abiertu’l serviciu d’urxencies

24/01/2019

Los efectos del temporal obligaron güei a suspender les clases en más d’una ventena de centros educativos, la mayoría nel valle del Nalón. Los conceyos más afectaos son Samartín del Rei Aurelio, Llangréu y Llaviana, amás de Parres, na contorna oriental. Tamién hubo munches incidencies nes llinies de tresporte escolar.

En Samartín del Rei Aurelio suspendiéronse les clases en toles escueles públiques (El Parque, El Bosquín, El Coto y Rey Aurelio) y concertaos (Sagrada Familia y San José) y nos institutos (Juan José Calvo Miguel y Virgen de Covadonga).

En Llangréu, la midida afecta a los institutos Jerónimo González y La Quintana; a les escueles públiques Gervasio Ramos y José Bernardo, y al Centru d’Educación Especial Juan Luis Iglesias Prada.

En Llaviana, l’actividá llectiva sigue suspendida nel CP Elena Sánchez Tamargo, qu’ayeri desapolinaron, y güei paralizóse nel CP Maximiliano Arboleya, en Los Barreros; nel IES Alto Nalón, qu’evacuaron por una inundación, y nel IES David Vázquez Martínez.

Amás, el CP Río Sella y l’IES El Sueve, dambos en Les Arriondes, caltiénense zarraos dende ayeri.

N’área d’occidente, zarráronse la escuela pública San Miguel, de Trevías (Valdés) y la escuela de Riberas (Pravia) del Colexu Rural Agrupáu Bajo Nalón.

Nel casu de Siero, ta previsto que mañana vuelvan entamar les clases nel IES Astures de Llugones, anque se van caltener zarraos dellos espacios. Tamién se suspendió l’actividá llectiva nel IES de Trubia, n’Uviéu.



Incidencies nel sistema sanitariu

Otra manera, güei sigue interrumpida l’actividá programada nel Hospital del Oriente Francisco Grande Covián, en Les Arriondes, onde namás sigue abiertu’l serviciu d’urxencies, onde se sigue atendiendo a la población. La Conseyería de Sanidá evacuó ayeri’l centru y reasitió a 38 pacientes n’hospitales d’Uviéu, Xixón y Avilés.

L’asistencia ta desenvolviéndose con normalidá nel restu de la rede sanitaria, sacante nel consultoriu periféricu d’Urbiés, en Mieres, que permanez zarráu porque la carretera d’accesu ta cortada. Por esta razón, les consultes treslladáronse al consultoriu de San Andrés y contactóse con toles persones citaes pa güei pa informales.



Situación de carreteres y puertos

Les precipitaciones tan fuertes causaron incidencies en 135 carreteres de la rede autonómica, con cortes totales, en 41, y parciales, en 94. D’elles, 16 viéronse afectaes por llenes, 107 por argayu y 12 por fundimientu de plataforma.

El temporal tamién provocó daños nel dique de Navia, llevó una baliza nel de San Esteban y estropió otros dos nel muelle de Ribeseya.

 

Información sobre el documento

© Copyright 2006. Gobiernu del Principau d'Asturies