Gobiernu del Principau d'Asturies

Asturies, muncho más cerca

Tas en

Asturias.es L’alumnáu d’Asturies supera la media de la OCDE en toles ...
 

Aniciu

L’alumnáu d’Asturies supera la media de la OCDE en toles competencies educatives, según l’últimu informe PISA

- El promediu del Principáu ameyora’l d’España en diez puntos en matemátiques y en 13 en ciencies

03/12/2019

  • El programa constata que la escolarización temprana incide nel éxitu académicu
  • La Conseyería d’Educación quier reducir el porcentaxe de repetidores y impulsar l’aprendimientu por competencies

El sistema educativu asturianu presenta meyores resultaos que’l promediu de los 36 países de la Organización pa la Cooperación y el Desenvolvimientu Económicos (OCDE) pela tercer edición siguida (2012, 2015, 2018) en toles competencies, superiores tamién a la media d’España. Asina lo revela l’últimu informe del Programa Internacional d’Evaluación del Alumnáu (PISA), correspondiente al 2018, onde participaron 2.096 estudiantes de 55 centros educativos, que representen al 98 % de la población de 15 años de la comunidá.

En concreto, el promediu d’Asturies ye 10 puntos superior al d’España en matemátiques, onde la comunidá llogra una puntuación de 491, y 13 puntos superior en ciencies, onde la media de la rexón asítase en 496. Amás, Asturies llogra 2 puntos más que la OCDE en matemátiques y 7 más en ciencies. En nenguna de les dos competencies hai diferencies estadísticamente significatives ente homes y muyeres.

La evaluación, na que participaron 79 países, incluyíos los 36 países miembros de la OCDE, pon de manifiestu que les oportunidaes d’aprendimientu tán claramente rellacionaes colos resultaos.

Asina, aquel alumnáu que s’escolarizó n’educación infantil de forma temprana presenta ventayes perceptibles hasta una década depués. La repetición escolar, pela so parte, tien efectos non deseables tanto a nivel cognitivu (resultaos más baxos), como socio-afectivu (menor motivación y espectatives académiques).

L’informe constata que les tases de repetición n’Asturies son mayores de lo esperao en función del porcentaxe d’estudiantes que presenta niveles competenciales baxos. Esto evidencia la necesidá d’ameyorar les tases d’idoneidá y amenorgar esti fenómenu que lleva años ensin presentar variaciones.

Los resultaos revelen tamién que, igual qu’asocede n’España, l’alumnáu del Principáu amuesa meyor desempeñu nos ítems rellacionaos cola reproducción de conteníos y tien más dificultaes cuando se trata d’aplicalos a contestos y situaciones non escolares. Nesi sentíu, convien empobinar la reforma curricular escontra l’aprendimientu por competencies y al usu de metodoloxíes actives.

Na presentación del informe, la conseyera d’Educación, Carmen Suárez, señaló que, a pesar de la información tan valiosa qu’ufierta, PISA nun pue tomase como un diagnósticu integral y definitivu del sistema educativu asturianu, porque se tendría qu’interpretar xunto a otros munchos parámetros como los recursos y la inversión educativa, el diseñu y los elementos del currículu, les tases de repetición y d’abandonu escolar, el nivel de formación de la población o les tases d’inxertamientu.

Información sobre el documento

© Copyright 2006. Gobiernu del Principau d'Asturies