Gobiernu del Principau d'Asturies

Asturies, muncho más cerca

Tas en

Asturias.es Jorge García asume la Viceconseyería d’Infraestructures, ...
 

Aniciu

Jorge García asume la Viceconseyería d’Infraestructures, Movilidá y Territoriu

Jorge García asume la Viceconseyería d’Infraestructures, Movilidá y Territoriu. L’Executivu completa la so reestructuración colos nomamientos de les persones que van ocupar les diez direcciones xenerales afectaes. L’economista Miguel Ángel Rodríguez Fernández va facese cargu de Función Pública pa encarar la modernización de l’Alministración. José Manuel López Guerrero, funcionariu del cuerpu de profesores técnicos de formación profesional, ye’l director xeneral nuevu de Personal Docente

03/07/2020

El Conseyu de Gobiernu aprobó güei los nomamientos correspondientes a la nueva estructura del Executivu. Jorge García, hasta agora director xeneral de Movilidá y Conectividá, va asumir la Viceconsejería d’Infraestructures, Movilidá y Territoriu. L’economista Miguel Ángel Rodríguez Fernández, na actualidá director económicu financieru de Xispasa, va facese cargu de la Dirección Xeneral de Función Pública.

El presidente del Principáu, Adrián Barbón, anunció’l 20 de xunu la reestructuración con un oxetivu doble: encarar la reforma de l’Alministración y sofitar el desenvolvimientu del mediu rural. El xueves, el Conseyu de Gobiernu aprobó los decretos d’estructura y esta mañana decidiéronse los nomamientos. Son diez, qu’afecten a otres tantes direcciones xenerales. Estos cambeos namás incluyen dos nomes nuevos –los directores de Función Pública y de Personal Docente- y nun aumenten el númberu global de cargos altos, desque l’Axencia de Tresportes desapaez pa integrase na Dirección Xeneral de Tresportes y Movilidá.

L’economista Miguel Ángel Rodríguez Fernández va facese cargu de la Dirección Xeneral de Función Pública en sustitución de Margarita Isabel Fernández Vega. Esta área depende agora de la nueva Conseyería d’Alministración Autonómica, Mediu Ambiente y Cambéu Climáticu, encabezada por Juan Cofiño, y va tener como retu encarar la modernización del sector públicu. Per otru llau, José Manuel López Guerrero, funcionariu del cuerpu de Profesores Técnicos de Formación Profesional, va facese cargu de la Dirección Xeneral de Personal Docente. Va reemplazar a Miguel Ángel Barón, que dexa’l puestu a pidimientu propiu.

El Gobiernu d’Asturies agradez a María Isabel Fernández Vega y a Miguel Ángel Barón el trabayu realizáu de magar empezó la llexislatura.



Miguel Ángel Rodríguez Fernández, director de Función Pública

Miguel Ángel Rodríguez Fernández (Llión, 1970) ye doctor n’Alministración y Dirección d’Empreses (premiu estraordinariu), llicenciáu en Ciencies Empresariales y diplomáu nesta mesma materia na especialidá de Contabilidá y Información. Hasta agora ocupaba’l cargu de director económicu financieru na empresa pública Xestión d’Infraestructures Sanitaries del Principáu d’Asturies (Xispasa), responsabilidá que tamién exerció ente 2013 y 2017.

Amás, foi director Económicu Financieru y d’Infraestructures del Serviciu de Salú del Principáu d’Asturies (Sespa) dende’l 2017 hasta setiembre del 2019.

Rodríguez Fernández tuvo vinculáu llaboralmente ente’l 2002 y 2013 a la Sociedá Estatal d’Agua de les Cuenques del Norte, onde exerció de director económicu alministrativu, director alministrativu financieru y secretariu xeneral. N’ámbitu académicu, tamién realizó estudios del grau en Tecnoloxíes de la Información y ye coautor de dellos llibros rellacionaos cola alministración y la xestión económica, lo mesmo que d’artículos científicos en delles revistes internacionales.



José Manuel López Guerrero

José Manuel López Guerrero (Jugenheim, Alemaña, 1964) estudió Ciencies Empresariales na Escuela Universitaria Xovellanos y llicencióse na mesma especialidá pola Universidá Nacional d’Educación a Distancia (UNED). Dende 1987, ye funcionariu de carrera del cuerpu de profesores técnicos de formación Profesional, nes especialidaes de Procesos de Xestión Alministrativa y Procesos Comerciales.

Foi xefe d’estudios nel IES Altu Nalón (1991-1997) y nel Centru Integráu de Formación Profesional de los Sectores Industrial y de Servicios La Llaboral ente’l 2010 y el 2017. Nestos centros tamién coordinó les Tecnoloxíes de la Información y de la Comunicación (TIC). Amás, impartió formación al profesoráu, presencial y en llinia, n’ámbitu de les TIC y ferramientes de xestión empresarial al traviés de delles plataformes de la conseyería y del Ministeriu d’Educación. Ye autor de dellos llibros de testu pa ciclos del área d’Alministración y Xestión y d’otros materiales formativos pal ministeriu.



Nomamientos n’otres direcciones xenerales

La llista de nomamientos implica a cuatro conseyeríes. Tamién s’autorizaron estes designaciones:

  • Conseyería de Presidencia
  • Director xeneral de Seguranza y Estratexa Dixital: Javier Fernández Rodríguez (hasta agora ocupaba l’área llamada Dirección Xeneral de Sector Públicu, Seguranza y Estratexa).
  • Directora xeneral de Mocedá, Diversidá Sexual y Derechos LGTBI: Clara Sierra (enantes directora del Institutu Asturianu de la Mocedá)
  • Conseyería de Mediu Rural y Cohesión Territorial
  • Director xeneral de Ganadería y Sanidá Animal: Saturnino Rodríguez (ocupaba la Dirección Xeneral de Ganadería).
  • Directora xeneral de Desenvolvimientu Rural y Agroalimentación: María Begoña López Fernández (ocupaba’l cargu de directora xeneral de Desenvolvimientu Rural y Industries Agraries).
  • Director xeneral d’Infraestructures Rurales y Montes: Fernando Prendes Fernández-Heres (hasta agora director xeneral de Planificación, Infraestructures Agraries y Montes).
  • Director xeneral del Mediu Natural y Planificación Rural: David Villar García (ocupaba la dirección xeneral del Mediu Natural).
  • Directora xeneral d’Infraestructures Viaries y Portuaries: María Esther Díaz López (enantes al mandu de la Dirección Xeneral d’Infraestructures).
  • Director xeneral de Tresportes y Movilidá: José Manuel Caldevilla Suárez (dirixía l’Axencia Asturiana de Tresportes y Movilidá).

Información sobre el documento

© Copyright 2006. Gobiernu del Principau d'Asturies