Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu La reparación d’un fundimientu na carretera Sotrondio-Figareo ...
 

Infraestructures y territoriu

La reparación d’un fundimientu na carretera Sotrondio-Figareo obliga a cortar el tráficu a l’altura de Perabales a partir del llunes

La restricción al pasu de vehículos va ser total a lo llargo de cuasi trés selmanes poles obres, que tienen un costu calculáu de 90. 750 euros

29/11/2019

Les obres d’arreglu d’un fundimientu de la carretera AS-337, que xunta Sotrondio y Figareo, nel puntu quilométricu 3,620, al altor del nucleu de Perabales (Samartín del Rei Aurelio), van obligar a realizar un corte total del tráficu na vía alredor de trés selmanes. Les restricciones al pasu de vehículos van empezar el llunes. Por esti motivu, aconséyase a los usuarios esviase pela carretera LA-7, que xunta Ciañu y Urbiés.

La Conseyería d’Infraestructures, Mediu Ambiente y Cambéu Climáticu axudicó por trámite d’emerxencia l’arreglu d’esti fundimientu, consecuencia de les precipitaciones tan intenses d’esti mes y que ye menester iguar de forma inmediata por motivos de seguranza. El presupuestu calculáu de la obra xube a 90.750 euros. Los operarios van trabayar tamién los díes festivos pa que les molesties a los usuarios s’arreglen lo primero posible.

El fundimientu afectó a gran parte de la sección tresversal del vial, torgando’l pasu de vehículos. El temporal tamién produció la rotura d’una obra de drenaxe nel puntu quilométricu 1,600 de l’AS-337, que la conseyería va reponer nestes trés selmanes.

Estes actuaciones d’emerxencia van consistir na execución d’un muriu de formigón de sostenimientu, d’aproximao 24 metros de llargor y 4,5 metros d’altor mediu d’alzáu nel quilómetru 3,620. Tamién se va ameyorar el drenaxe nel puntu quilométricu 1,6, amás de la reconstrucción del paquete de firme, la instalación de la barrera de seguranza, y el pintáu de marques viales na zona afectada pola actuación.

Amás, Infraestructures ta executando, tamién por trámite d’emerxencia, les obres d’arreglu del fundimientu nel puntu quilométricu 7,910 d’esta mesma carretera y de recoyida d’agua nel 7,625, estroces rexistraes de resultes del temporal del mes d’ochobre pasáu. El costu calculáu d’esti proyectu ye de 70.000 euros.

Información sobre el documento

© Copyright 2006. Gobiernu del Principau d'Asturies