Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá El tráficu a la basílica de Cuadonga va cortase dende mañana ...
 

Tresportes y Movilidá

El tráficu a la basílica de Cuadonga va cortase dende mañana hasta’l vienres poles obres de reparación de la esplanada

La circulación va interrumpise al altor de la rotonda d’El Peregrino ente les 08:00 hores d’esti llunes y les 20:00 hores del día 29 de payares. L’accesu va tar abiertu a turismos y vehículos de repartu hasta l’hotel Pelayo

24/11/2019

Les obres d’acondicionamientu de la esplanada de la basílica de Cuadonga van obligar a cortar la carretera d’accesu al real sitiu dende mañana llunes hasta’l vienres, 29 de payares. La interrupción va producise na rotonda d’El Peregrino, que reparte’l tráficu a Cuadonga y Los Llagos. L’accesu va caltenese abiertu a turismos y vehículos de repartu hasta l’hotel Pelayo.

El vial va permanecer cortáu dende les 08:00 hores de mañana hasta les 20:00 hores del vienres, momentu en que se va restablecer la circulación pa facilitar l’accesu na fin de selmana.

La Conseyería d’Infraestructures, Mediu Ambiente y Cambéu Climáticu empecipió a principios d’esti mes les obres na esplanada, que suponen una inversión de 433.277 euros.

Les actuaciones, con un plazu d’execución de trés meses, planiáronse teniendo en cuenta la meteoroloxía y l’arribación turística al santuariu. Asina, una tercer parte de la obra va executase no que resta d’añu, otra en primavera y la postrera n’ochobre del 2020, cola mira d’interferir lo menos posible nel accesu al real sitiu.

Los trabayos consisten na reposición del pavimentu en mal estáu dende la plaza de la Basílica hasta’l principiu del accesu peatonal a la Santa Cueva, incluyendo la zona de rodadura, la vía sacra y los aparcamientos asitiaos frente a les cases de los canónigos.

Nestos llabores van usase los mesmos materiales qu’existen na actualidá, sacante na zona d’aglomeráu asfáltico énte les cases de los canónigos, que se va sustituyir por piedra caliar Griotte.

Información sobre el documento

© Copyright 2006. Gobiernu del Principau d'Asturies