Gobiernu del Principau d'Asturies

Asturies, muncho más cerca

Tas en

Asturias.es Mayores Derechos Sociales pon en marcha una mesa de trabayu para definir ...
 

Mayores

Derechos Sociales pon en marcha una mesa de trabayu para definir un nuevu modelu d'atención residencial en centros pa mayores

L'órganu va cuntar con representación del Gobiernu d'Asturies, l’ERA, la FAMPA y asociaciones del sector

18/06/2020

La Conseyería de Derechos Sociales y Bienestar va poner en marcha una mesa de trabayu para definir un nuevu modelu d'atención residencial nos centros pa persones mayores. Esta iniciativa surde de la collaboración que caltuvo'l departamentu qu'encabeza Melania Álvarez coles organizaciones que representen a estos centros y tamién coles asociaciones de familiares na xestión de la crisis sanitaria.

La mesa va tar integrada por representantes de la conseyería y del organismu autónomu Establecimientos Residenciales pa Mayores d'Asturies (ERA), les asociaciones de familiares, la Federación d'Asociaciones de Mayores (Fampa) y les patronales del sector.

Esti proyectu va dar continuidá a les midíes desenvueltes dende Derechos Sociales, qu'inclúi ente les sos prioridaes l'adaptación al cambéu social qu'implica la necesaria evolución del modelu d'atención a les persones.

Nel ámbitu de les residencies de mayores, los primeros pasos diéronse yá antes de la emerxencia sanitaria, por aciu la definición del contratu programa ente l’ERA y la conseyería, que supunxo una meyora na evaluación de l'atención na rede púbica. El segundu afitáu foi'l cambéu del propiu decretu d'estructura y funcionamientu del ERA, cola creación d'un área centrada específicamente na calidá, la seguridá y l'atención.

“Tres meses d'aprendizaxe compartíu, con una coordinación sociosanitaria que se punxo a prueba y tovía en plena xestión de la incertidume, tenemos la certidume de que'l camín qu'entamemos a finales de 2019 ye'l correctu y que va ser mester afondar en modelos reconocíos d'atención centrada nes persones y na metodoloxía de calidá n’entornos seguros”, sorrayó la conseyera, Melania Álvarez.

“Ye esti camín nel que pretendemos avanzar de la mano colos actores implicaos, porque una de les llecciones que nos dexa esta crisis sanitaria ye que xuntos somos más fuertes y llegamos más llueñe”, añedió.

Información sobre el documento

© Copyright 2006. Gobiernu del Principau d'Asturies