Gobiernu del Principau d'Asturies

Asturies, muncho más cerca

Tas en

Asturias.es El Principáu llogra que se reconoza’l derechu a una compensación ...
 

Aniciu

El Principáu llogra que se reconoza’l derechu a una compensación económica poles rebaxes nes matrícules universitaries

El ministeriu comprométese a dotar de fondos a les autonomíes como solicitaba Asturies. El conseyeru de Ciencia destaca que la comunidá ye la cuarta coles tases más baxes. Les matrícules de graos y másteres na Universidá d'Uviéu son un 33% más barates que la media española

27/05/2020

El Principáu va recibir una compensación pol esfuerzu realizáu nos últimos años en rebaxar de tases académiques en graos y másteres y va optar a fondos nacionales y europeos pa xubir la financiación de la Universidá. El Gobiernu d'España atiende asina'l pidimientu plantegáu pol Executivu autonómicu, xunto con otres comunidaes, pa que'l sistema universitariu se convierta n'una prioridá nel proyectu de reconstrucción del país tres la COVID-19 y pa que les autonomíes con tases académiques más baxes, como Asturies, nun se vean perxudicaes na repartida.

El conseyeru de Ciencia, Innovación y Universidá, Borja Sánchez, defendió na so intervención na Conferencia de Política Universitaria que'l nuevu modelu de precios públicos, qu'en términos xenerales plantega'l regresu a les tases de 2011, venga acompañáu de fondos, y acoyó con optimismu l'anunciu que'l ministru d'Universidaes, Manuel Castells, realizó nesa llinia al entamu de la xunta.

Sánchez treslladó'l so contentu énte'l compromisu del ministeriu de que les comunidaes que realizaron esfuerzos de contención y rebaxa de los precios públicos universitarios nestos años nun se vean penalizaes.

Nesti sentíu, el titular de Ciencia recordó que la Universidá d'Uviéu ye un 33% más barata que la media española, una y bones el preciu del creitu pal próximu cursu asítiase en 12,69 euros, cinco euros per debaxo del que s'abonaba nel cursu 2011-2012. Asturies asítiase asina la cuarta comunidá con costos más baxos de matrícula.

El conseyeru indicó, amás, qu'Asturies va un pasu más allá de la propuesta del ministeriu y va conxelar el próximu cursu les tases de toles matrícules universitaries, mesmo de graos como de másteres, non solo de la primera. Esta midida tien un impactu económicu pa les arques públiques rexonales de cinco millones d'euros.

El ministru treslladó a les comunidaes que se van habilitar fondos especiales pa compensar la baxada de matrícules –una iniciativa pa la que s'establez un calendariu de trés años- y p'alzar la financiación universitaria. Estes partíes, entá por cuantificar, van proceder tanto de presupuestos nacionales como de fondos europeos.

Sánchez sofitó esta propuesta ministerial una y bones, al so xuiciu, “contémplase la política universitaria como un proyectu de país, con una torna en forma de beneficiu socioeconómicu y eso rique financiación adicional pa les inversiones pertinentes”. El Gobiernu d'Asturies confía nun repartu que compense a les comunidaes que realizaron más esfuerzos y del que, al tiempu, ardíciense les families que más lo precisen.

Información sobre el documento

© Copyright 2006. Gobiernu del Principau d'Asturies