Gobierno del Principado de Asturias

Asturias, mucho más cerca

Estás en

Aniciu Temes Ganadería Bienestar Animal Desenvolvimientu Rural firma un conveniu con asociaciones ...
 

Bienestar Animal

Desenvolvimientu Rural firma un conveniu con asociaciones ganaderes pa la investigación y desenvolvimientu de les races

L’alcuerdu de collaboración regula la prestación de servicios del Serida a Aseava, Aseamo y Ascol

22/02/2019

La Conseyería de Desenvolvimientu Rural y Recursos Naturales suscribió un conveniu de collaboración coles asociaciones ganaderes de la raza Asturiana de los Valles (Aseava), la raza Asturiana del Monte (Aseamo) y l’Asturiana de Control Llecheru (Ascol), pol que se regula la prestación de trabayos del Serviciu d’Investigación y Desenvolvimientu Agroalimentariu (Serida) a estes trés entidaes, tanto n’investigación como en desenvolvimientu.

El conveniu da continuidá a les actividaes que yá se realizaben nes instalaciones del Centru Nacional de Selección y Reproducción Animal de Somió, y que camudaron d’allugamientu nel 2008, col treslláu de los animales al centru d’inseminación de Cenero, tamién en Xixón. Va dexar incorporar ferramientes tecnolóxiques nueves a la rutina de trabayu de los profesionales, como les técniques d’análisis espermáticu pente medies del control d’imaxe col sistema Computer assisted sperm analisis.

El Serida va collaborar con estes entidaes ganaderes nes instalaciones del centru d’inseminación artificial que la empresa Asturgen xestiona en Cenero y nos centros de testaxe d’Aseava y Aseamo, allugaos en Posada (Llanera) y Piloña. En concreto, va realizar estes actividaes de soporte tecnolóxicu:

   - Ellaboración de dosis seminales: análisis cualitativu y cuantitativu del semen, procesáu y análisis post-desconxelación.
   - Tresferencia d’embriones conxelaos a femes receptores pertenecientes a los programes de meyora xenética de la raza frisona.
   - Valoración de l’aptitú reproductiva nos gües que pasen anualmente pelos centros de testaxe de les races Asturiana de los Valles y Asturiana del Monte.

Estes actuaciones ayuden a la modernización y meyora de les capacidaes del sector agroalimentariu col impulsu y execución de la investigación y el desenvolvimientu tecnolóxicu y agroalimentariu, tal como establecen los fines fundacionales del Serida.

 

   Icono gráfico alusivo al tipo de archivo Convenio SERIDA (Pdf: 748 Kb) (n'español)

Información sobre el documento

© Copyright 2006. Gobierno del Principado de Asturias