Gobierno del Principado de Asturias

Asturias, mucho más cerca

Estás en

Aniciu El desempléu baxa n'Asturies en 3.357 persones en xunetu y ...
 

Aniciu

El desempléu baxa n'Asturies en 3.357 persones en xunetu y asítiase en niveles asemeyaos a los del entamu de la pandemia

L'amenorgamientu del paru, del 4,14%, y l'aumentu de l'afiliación a la Seguridá Social, del 2%, son superiores a la media nacional. La bona evolución, que s'estiende a tolos sectores, ye más acusada nos conceyos con mayor actividá turística. La directora del Sepepa, Pilar Varela, apela a la prudencia y destaca la necesidá d'atender a los colectivos con mayores problemes pa incorporase al mercáu llaboral

04/08/2020

El paru baxa con fuerza n'Asturies por segundu mes consecutivu, al apuntase en xunetu un descensu del 4,14%, lo que supón que 3.357 persones abandonaron les llistes de demandantes d'empléu nos últimos 30 díes, según los datos publicaos güei pol Ministeriu de Trabayu y Economía Social. D'esta miente, el númberu de paraos asítiase en 77.633 y algama niveles asemeyaos a los de marzu, primer mes nel que tuvo vixente l'estáu d'alarma pola pandemia del coronavirus. Marzu concluyó con 77.451 persones rexistraes nes llistes del paru.

Estes cifres confirmen la progresiva recuperación del mercáu llaboral nel Principáu, que s'asitia como la cuarta comunidá con mayor cayida porcentual del desempléu y muestra una evolución más favorable que la media nacional. Nel conxuntu d'España'l paru menguó un 2,33%.

El desempléu baxó n'Asturies en tolos grupos d'edá, en términos absolutos más en muyeres que n'homes (-1.804 frente a -1.553) y en tolos sectores, a esceición del colectivu ensin empléu anterior. Por actividaes, destaquen retrocesos pencima de la media nos servicios y na construcción (-5,19% y -4,98%, respectivamente), del -3,22% na industria (222 paraos menos) y, en menor midida, na agricultura y la pesca, con una baxada del 0,70% y diez desemplegaos menos.

Por conceyos, el desempléu baxa de manera pronunciada nos de mayor población: 505 n'Uviéu (-2,99%), 727 en Xixón (-3,07%), 216 n'Avilés (-3,23%) y 105 en Siero (-2,76%). Sicasí, les cayíes más relevantes concéntrense en dalgunos de los conceyos más dependientes de l'actividá turística, concretamente en Cabrales (-34,07%), Cangues d'Onís (-30,74%), Colunga (-17,65%), Llanes (-18,05%), Onís (-20,51%) y Valdés (-12,13%).

Anque l'enclín na recuperación del empléu yá se detectó en mayu, con desescalada, foi en xunu y xunetu cuando se produció una evolución más favorable de los indicadores llaborales. Asina, nos últimos trenta díes, la contratación creció'l 52,47%: 28.596 contratos, 9.841 más que la puesta en marcha del procesu d'en xunu, de los que 1.952 fueron indefiníos. Nesti sentíu, destaquen los 3.228 de la industria y los 1.400 de la construcción.

Coles mesmes, la Seguridá Social ganó 7.061 cotizantes, hasta asitiase el númberu d'afiliaos en 360.286, lo que supón una meyora del 2% frente al 0,78% del promediu nacional. Asturies foi la tercer comunidá na que más aumentaron les afiliaciones, namás per detrás de Baleares (2,58%) y Cantabria (4,00%). Amás, 11.633 trabayadores dexaron de tar afectaos por regulaciones d'empléu, polo que'l númberu de persones con contratu suspendíu total o parcialmente asítiase en 15.087.

A pesar d'estes resultancios positivos, el Gobiernu d'Asturies evalúa los datos con prudencia, una y bones el númberu de persones desocupaes sigue siendo bien superior al de va un añu, concretamente 12.267 paraos más (18,77%), con medres superiores al 20% na construcción y la industria.

La directora xerente del Serviciu Públicu d'Empléu (Sepepa), Pilar Varela, valora la evolución del desempléu en xunetu, con decrecimientos superiores a los rexistraos en xunu y una evolución más favorable que'l promediu d'España, pero recuerda que la crisis sanitaria tuvo un impactu bien fondu. “Esta situación rique afondar nes polítiques de formación y meyora de la empleabilidá nos colectivos con mayores dificultaes d'insertamientu, como les persones moces y los mayores de 45 años”, apuntó.

Información sobre el documento

© Copyright 2006. Gobierno del Principado de Asturias