Gobiernu del Principau d'Asturies

Asturies, muncho más cerca

Tas en

Asturias.es Temes Emplegu El mercáu llaboral recupérase n’Asturies con una baxada del ...
 

Emplegu

El mercáu llaboral recupérase n’Asturies con una baxada del desempléu de 2.870 persones en xunu

El paru rexistráu mengua’l 3,42 %, el meyor datu d’España, con cayíes fuertes nos grandes conceyos y retrocesos de dos díxitos nos más turísticos. La Seguridá Social recupera 2. 614 cotizantes el mes pasáu y la contratación aumenta’l 85,53 % en comparanza con mayu. La directora del Sepepa, Pilar Varela, señala qu’esta evolución confirma la meyora de l’actividá económica, pero avisa de que tamos lloñe de la situación anterior a la crisis sanitaria

02/07/2020

La recuperación progresiva de l’actividá económica n’Asturies ta traduciéndose nuna reactivación del empléu y nuna meyora de la contratación. Según los datos fechos públicos esta mañana pol Ministeriu de Trabayu y Economía Social, el desempléu rexistráu baxó en 2.870 persones en xunu, lo que supón un -3,42 % al respective del mes anterior.

Con esta evolución, el númberu de persones inscrites como demandantes d’empléu nes oficines del Serviciu Públicu d’Empléu (Sepepa) ye de 80.990. Asturies foi la comunidá autónoma col mayor descensu del desempléu en términos porcentuales y la cuarta n’absolutos.

Anque l’enclín na recuperación del empléu yá se notare en mayu cola puesta en marcha del procesu de desescalada, foi nes últimes selmanes cuando se produció una evolución más favorable de los indicadores llaborales. Asina, nos postreros trenta díes la contratación aumentó’l 85,53 % al rexistrase 18.755 contratos (8.646 más qu’en mayu), mentes que la Seguridá Social ganó 2.614 cotizantes (+0,75 %) hasta asitiar la cifra total d’afiliaciones en 353.225 persones. Amás, un total de 21.810 trabayadores dexaron de tar afectaos por regulaciones d’empléu.

A pesar d’estos resultaos, la interpretación de los datos del desempléu tien que se facer con prudencia pola mor del impactu de la crisis de la COVID-19: la cantidá de persones al paru sigue siendo bien más grande que la que se rexistraba’l 16 de marzu, al empezar l’estáu d’alarma. Nesa fecha había n’Asturies 72.848 paraos, 8.142 menos que los contabilizaos anguaño.

Amás, si comparamos el desempléu mediu de xunu col del mesmu mes del añu pasáu, la medría porcentual ye del 19,94 % (13.464 paraos más), lo que pon de manifiestu’l fuerte impactu económicu y social de la crisis sanitaria, anque ye ocho puntos inferior a la media nacional. Estos aumentos interanuales foron del 26,28 % y de 24,57 % na industria y la construcción, respectivamente.

Tocante a la evolución mensual del desempléu, en xunu rexistráronse descensos en dambos sexos, en tolos tramos d’edá y en tolos sectores económicos, sacante’l colectivu ensin empléu anterior. Destaquen les cayíes percima de la media rexonal na construcción (-6,30 % y 459 paraos menos), na industria (-3,83 % y 275 desempleaos menos) y nos servicios, onde’l retrocesu ta nel -3,80 % (-230 paraos).

Por conceyos, el paru baxó nos de más población, en llinia cola media rexonal: -2,10 % n’Uviéu; -3,86 % en Xixón; -3,56 % n’Avilés; y -3,98 % en Siero. Les cayíes más pronunciaes, de dos díxitos, concentráronse nos conceyos más sensibles o dependientes a l’actividá turística, concretamente en Cabrales (-16,65 %); Cangues d’Onís (-10,81 %); Colunga (-18,66 %); Llanes (-17,88 %) y Onís (-13,33 %).

Pilar Varela, directora xerente del Serviciu Públicu d’Empléu (Sepepa), valora la evolución tan positiva del desempléu en xunu, anque recuerda que la crisis sanitaria tuvo un impactu ensin precedentes nel mercáu de trabayu. “Estos datos ponen de manifiestu que la economía ta recuperándose progresivamente, pero nun tenemos qu’escaecer qu’entá tamos bien lloñe de la situación anterior a la pandemia, polo que les nuestres prioridaes tán n’algamar los niveles d’empléu anteriores a la crisis”, precisa.


Icono gráfico alusivo al tipo de archivo Audiu (Audiu: 3 Mb) (n'español)

Información sobre el documento

© Copyright 2006. Gobiernu del Principau d'Asturies