Gobiernu del Principau d'Asturies

Asturies, muncho más cerca

Tas en

Asturias.es Temes Sociedá de la información Educación facilita a los centros la puesta en marcha d'un ...
 

Sociedá de la información

Educación facilita a los centros la puesta en marcha d'un sistema de préstamu d'equipos informáticos pa la formación telemática

La conseyería pretende favorecer asina l'aprendimientu del alumnáu qu'escarez d'equipamientu tecnolóxicu na so casa. Carmen Suárez participó güei en videoconferencias colos comités de direcciones d'Infantil y Primaria y de Secundaria. pa la tercer evaluación, van tenese en cuenta les xeres desenvueltes y les actividaes encamentaes a partir del 14 de marzu, que nun suponen avances na materia

30/03/2020

El Gobiernu d'Asturies va facilitar a los centros educativos la puesta en marcha d'un sistema de préstamu d'equipos informáticos cola mira de favorecer la formación telemática del alumnáu qu'escarez d'equipamientu tecnolóxicu nes sos cases. La conseyera d'Educación, Carmen Suárez, informó güei por videoconferencia sobre esta midida a los comités de direcciones d'Infantil y Primaria y de Secundaria.

El Principáu va unviar un cuestionariu a los centros educativos pa recoyer datos sobre les families qu'escarecen de recursos tecnolóxicos y accesu a la información online, coles mires d'establecer un sistema de préstamu pa que puedan utilizar los ordenadores y les tabletas de los colexos y institutos.

Otra manera, Educación alcordó que, pa la tercer evaluación, van tener en cuenta les xeres desenvueltes a lo llargo del cursu na parte presencial y tamién les actividaes encamentaes al alumnáu dende'l 14 de marzu pasáu, ensin qu'esto suponga avanzar na materia, sinón afondar n'aspectos esenciales y competenciales.

Asina mesmo, la segunda evaluación va dase por rematada con fecha de 13 marzu. Los centros van unviar los boletinos informativos a les families y, en casu de dificultaes pa la entrega, va realizala a la vuelta a les clases presenciales.

Tocantes a la Prueba d'Evaluación de Bachilleratu pal Accesu a la Universidá (EBAU), la conseyera treslladó a les direcciones de los centros les propuestes de calendarios y conteníos, que se planifiquen en coordinación cola Universidá d'Uviéu.

Suárez tamién informó a los comités d'Infantil y Primaria y de Secundaria de que se caltién el calendariu escolar, polo que les vacaciones de Selmana Santa van ser del 6 al 12 d'abril y neses xornaes nun va haber actividá lectiva.

Toles disposiciones y alcuerdos alcanzaos van publicase nel portal d’Educastur (www.educastur.es ), nel apartáu de Noticies COVID-19.

Información sobre el documento

© Copyright 2006. Gobiernu del Principau d'Asturies