Gobiernu del Principau d'Asturies

Asturies, muncho más cerca

Tas en

Asturias.es Muyeres El presupuestu pa Igualdá permite ampliar la llucha contra la ...
 

Muyeres

El presupuestu pa Igualdá permite ampliar la llucha contra la violencia de xéneru con un programa de coeducación y un serviciu d'atención énte agresiones sexuales

Estos nuevos proyectos cunten con 590. 000 euros nes cuentes de la dirección xeneral pal 2020, que s'alcen a 5 millones. El plan de formación pa escolares empecipiará'l próximu cursu en doce centros y nes distintes etapes de la enseñanza. La escuela d'entamadores va tresformase nel Centru d'Innovación y Economía n'Igualdá pa combatir la precariedá y escasez nel empléu de les muyeres

15/12/2019

La Dirección Xeneral d'Igualdá va dar prioridá en 2020 a la prevención y la estensión de l'atención a toles manifestaciones de la violencia de xéneru, mesmo qu’al amenorgamientu de la fienda salarial. Pa ello, va empecipiar un programa de coeducación en centros escolares, va crear un serviciu d'atención énte agresiones sexuales y va tresformar la escuela d'entamadores nun Centru d'Innovación y Economía n'Igualdá. Toes estes iniciatives tán previstes nel proyectu de presupuestos pal próximu exerciciu, que destina 5 millones a la dirección xeneral que xestiona Nuria Varela.

El proyectu de coeducación naz cola cuenta d’erradicar la violencia de xéneru cola prevención y la educación n'igualdá. Coeducastur va empecipiase'l próximu cursu en doce centros coles mires d'implicar toles etapes escolares, dende la rede de 0 a 3 años hasta Secundaria. Pal diseñu de los conteníos y l'entamu del plan van destinase 60.000 euros, dientro d'un contratu tresañal que se va estender tola llexislatura.

Amás de la prevención, va poner en marcha'l Centru d'Emerxencia pa Violencia Sexual, cola fin d'atender un problema que va n'aumentu, especialmente ente la población más nueva. Esti nuevu serviciu va financiase íntegramente con dineru del Pactu d'Estáu contra la Violencia de Xéneru. Pa la so puesta en marcha destináronse 530.000 euros

La dirección d'Igualdá va realizar la primera macroencuesta sobre violencia de xéneru pa conocer les situaciones que viven les muyeres, especialmente nel ámbitu rural y les moces. L'oxetivu ye perfeccionar les polítiques públiques. La cantidá reservada xube a 70.000 euros, tamién con cargu al Pactu d'Estáu.

Como n'años anteriores, l'atención a les víctimes de violencia de xéneru sigue siendo una prioridá pa la Dirección Xeneral d'Igualdá. Asina, a la Rede de Cases d'Acoyida y los Centros Asesores de la Muyer van destinase 2,1 millones.



Plan d'igualdá

Otra de les novedaes ye la modernización de l'actual Escuela d'Entamadores y Empresaries que se va tresformar a lo llargo de 2020 nel Centru d'Innovación y Economía n'Igualdá coles mires de combatir la precariedá y escasez nel empléu de les muyeres, lo mesmo que de amenorgar la fienda salarial. El centru va potenciar l'apertura de nuevos nichos de mercáu y va realizar les xeres de formación y acompañamientu pa desenvolver proyectos empresariales y cooperatives. El desenvolvimientu de la economía n'igualdá ye vital p'asitiar población nel ámbitu rural y pal desenvolvimientu de la corresponsabilidad de los cuidos. Asígnense 130.000 euros pal caltenimientu del centru y les actividaes formatives.

Coles mesmes, el próximu añu va poner en marcha del Plan d'Igualdá del Principáu d'Asturies que se va desenvolver a lo llargo de la llexislatura. Ta yá ellaboráu'l diagnósticu y va empezase a aplicar en 2020. Esti proyectu arreya a 35.000 persones, aprosimao, polo que se preve la so implantación progresiva. Pa ello destinaránse 30.000 euros. Per otru llau, va amontar en 50.000 euros la convocatoria de subvenciones p'asociaciones de muyeres y otres entidaes, que van pasar a tener un presupuestu de 493.520 euros.

Del presupuestu global de 5.073.031 euros, 2.359.531 euros provienen de l'Alministración Xeneral del Estáu, con cargu al Pactu d'Estáu contra la Violencia de Xéneru y otros programes. Coles mesmes, 662.817 euros provenientes tamién del Pactu d'Estáu distribuyéronse a otros departamentos. Ente ellos destaquen, los 337.441 euros que se van destinar a Viceconseyería de Xusticia pa reforzar con personal nuevo los recursos d'atención a les víctimes; los 100.000 euros asignaos a la Dirección Xeneral de Deporte p'acciones de visibilización de les muyeres nel ámbitu deportivu y los 50.000 euros dedicaos a la Conseyería de Salú pa programes de prevención na educación afectivu sexual y la formación de profesionales. Tamién se va destinar 54.000 euros a la Dirección Xeneral d'Universidaes pa la meyora de la formación del profesoráu n'igualdá y violencia de xéneru.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies