Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’ Asturies alerta en Bruxeles de los riesgos que ...
 

Aniciu

El Gobiernu d’ Asturies alerta en Bruxeles de los riesgos que conlleva’l desequilibriu na migración de talentos dientro de la UE

La conseyera Carmen Suárez intervién énte'l Conseyu Européu d'Educación, qu'esti semestre va ser coordináu pol Principáu. L'Executivu autonómicu destaca la próxima puesta en marcha del programa Margarita Salas, concebíu pa la retención d'investigadores con esperiencia internacional

La consejera, Carmen Suárez, con el ministro de Universidades, Manuel Castells

20/02/2020

La conseyera d'Educación del Gobiernu d'Asturies, Carmen Suárez, defendió güei en Bruxeles el planteamientu de les comunidaes autónomes españoles énte'l Conseyu d'Educación de la Unión Europea. Na sesión, los ministros de los países miembros adoptaron una resolución sobre educación y formación nel Semestre Européu y caltuvieron un alderique públicu sobre la circulación de talentos.

La conseyera defendió que, magar esta llibre circulación del talentu y espardimientu de conocimientos ya idees en tola Unión ye beneficiosa, les rexones emisores, como Asturies, enfréntense a un descensu potencial de la so fuerza llaboral nos próximos años, agraváu polos baxos índices de natalidá y el consiguiente avieyamientu de la población, especialmente acuciosa nel Principáu.

“Trátase d'un fenómenu verdaderamente complexu que debe concitar l'actuación de les esferes local, rexonal, nacional y supranacional (UE). Solo d'esta miente vamos algamar un equilibriu en términos xurídicos y políticos ente dos principios esenciales de la Unión Europea: la llibre circulación del nuestru capital humanu y la converxencia económica y social ente rexones”, señaló.

Suárez refirióse a delles iniciatives autonómiques coles que se trata de consiguir que la circulación de talentos seya más equilibrada. Énte'l Conseyu d'Educación, recordó que'l Gobiernu asturianu va poner en marcha anguaño un programa d'atracción y retención de talentu que lleva'l nome de Margarita Salas, n'homenaxe a la bioquímica asturiana discípula de Severo Ochoa finada en 2019. La Conseyería de Ciencia, Innovación y Universidá trabaya nes bases de la primer convocatoria empobinada a científiques y científicos d'oldeada esperiencia internacional con cuenta de que puedan desenvolver el so trabayu n'Asturies.

La participación de les comunidaes autónomes na representación española nel Conseyu de la UE consolidóse nos últimos años como una práctica arriquecedora, que demuestra la importancia de la collaboración interinstitucional. Según el calendariu, correspuénde-y al Principáu d'Asturies la coordinación del Conseyu d'Educación nesti primer semestre, baxo la presidencia de Croacia.

Dende l'añu 2005, el Principáu d'Asturies coordinó la participación autonómica de los Conseyos d'Agricultura y Pesca (2006 y 2015); Empléu y Política Social (2008 y 2018); Salú (2005 y 2014); Mocedá (2008 y 2018); Mediu Ambiente (2011 y 2019); Cultura (2011 y 2020); Deporte (2014), y Educación (2011 y 2020).



Intensa axenda en Bruxeles

La conseyera cerró xuna intensa axenda de trabayu en Bruxeles, qu'inclúi una xinta col eurodiputáu Doménec Ruiz, miembru de la Comisión d'Educación del Parlamentu Européu; col secretariu d'Estáu d'Educación, Alejandro Tiana; y col director xeneral de Planificación y Xestión Educativa del Ministeriu d'Educación y Formación Profesional, Diego Fernández, ente otres autoridaes. Suárez va entrevistase tamién cola embaxadora d'España énte Bélxica, Beatriz Larrotcha, y va visitar la Conseyería d'Educación y la Escuela Europea IV de Bruxeles, nel barriu de Laeken, que dirixe'l valencianu Manuel Bordoy.

Información sobre el documento

© Copyright 2006. Gobiernu del Principau d'Asturies