Gobiernu del Principau d'Asturies

Asturies, muncho más cerca

Tas en

Asturias.es El Principáu empieza la redacción de los planes d’adaptación de ...
 

Aniciu

El Principáu empieza la redacción de los planes d’adaptación de los puertos asturianos al cambéu climáticu

La firma del conveniu cola Fundación Institutu d’Hidráulica Ambiental de Cantabria fai posible principiar los trabayos, que tienen un plazu de 14 meses. L’Executivu autonómicu foi pioneru na busca d’estratexes efectives frente a esti fenómenu na costa

De izquierda a derecha: Elena Marañón, directora general de Prevención y Control Ambiental; el consejero de Infraestructuras, Ordenación del Territorio y Medio Ambiente, Benigno Fernández; el vicepresidente de la Fundación Instituto de Hidráulica Ambiental de Cantabria, Raúl Medina; y el director general de Infraestructuras y Transportes, José María Pertierra

19/06/2019

El conseyeru d’Infraestructures, Ordenación del Territoriu y Mediu Ambiente, Benigno Fernández Fano, firm güei un conveniu de collaboración col vicepresidente de la Fundación Institutu d’Hidráulica Ambiental de Cantabria, Raúl Medina Santamaría, pa la ellaboración de los planes d’adaptación al cambéu climáticu de los terrenós de dominiu públicu marítimo-terrestre adscritos al Principáu.

Esti proyectu tien un costu de 511.000 euros y un plazu d’execución de 14 meses, lo que va dexar cumplir col marcu temporal establecíu pol Ministeriu pa la Transición Ecolóxica nel contestu del plan Pima Adapta Costa, qu’asignó a Asturies 151.395 euros pa collaborar na so redacción. Esti documentu va dexar al Principáu trabayar más eficazmente, tanto p’ameyorar la funcionalidá de les instalaciones portuaries como pa reforzar la función de los puertos como primer llinia de defensa d’árees poblaes.

En virtú del alcuerdu, l’Alministración autonómica va apurrir información sobre les operaciones, l’actividá económica y los daños históricos asociaos a cada puertu. Pela so parte, la fundación cántabra va analizar los riesgos del cambéu climáticu nestes infraestructures, va proponer midíes d’actuación y va encargase de redactar el plan autonómicu d’adaptación.

En concreto, va realizase un análisis multinivel de los riesgos del cambéu climáticu nos puertos adscritos al Principáu énte escenarios estremaos, van proponese midíes naquellos que seya menester y va ellaborase’l plan autonómicu d’adaptación, que va incluyir una evaluación de la rellación ente’l costu y la eficacia de les midíes.



Estudios pioneros

Estos trabayos dan continuidá a una partida d’estudios pioneros sobre les evidencies y los efectos potenciales del cambéu climáticu na comunidá autónoma qu’empezaron nel 2009. Depués, nel 2013 firmóse un conveniu col Ministeriu d’Agricultura, Alimentación y Mediu Ambiente, que nel so marcu desenvuélvese un proyectu pilotu pa evaluar la vulnerabilidá de la costa asturiana basáu nuna metodoloxía específica novedosa implementada pol Institutu d’Hidráulica de Cantabria.

Esi estudiu pilotu, llamáu abreviadamente C3E-Asturies, foi concebíu como continuación y aplicación d’otru más ampliu: Cambéu climáticu na costa española (C3E), que valió de base pa la redacción de la Estratexa Española d’Adaptación al Cambéu Climáticu aprobada nel 2017.

 

   Icono gráfico alusivo al tipo de archivo Audiu (Audiu: 963 Kb) (n'español)

Información sobre el documento

© Copyright 2006. Gobiernu del Principau d'Asturies