Gobiernu del Principau d'Asturies

Asturies, muncho más cerca

Tas en

Asturias.es El VI Foru del Metal axunta 119 compañíes internacionales y 56 ...
 

Aniciu

El VI Foru del Metal axunta 119 compañíes internacionales y 56 empreses asturianes

El conseyeru d’Empléu destacó que se van producir 1. 315 alcuentros billaterales p’amosar les capacidaes de la industria de la comunidá y atrayer proyectos de valor altu. El sector, que representa’l 11 % del Productu Interior Brutu del Principáu, suma más de 1. 155 firmes que dan empléu a 28. 800 trabayadores

En la mesa de izquierda a derecha: El vicepresidente primero de la Cámara de Gijón, Pedro López; el consejero de Empleo, Industria y Turismo, Isaac Pola; la alcaldesa de Gijón, Ana González; el presidente de Femetal, Guillermo Ulacia; y la directora general de Asturex, Teresa Vigón

18/06/2019

El VI Foru del Sector Metal axunta dende güei 119 compañíes internacionales procedentes de 34 países que van tener más de 1.315 entrevistes con 56 empreses asturianes. El conseyeru d’Empléu, Industria y Turismu, Isaac Pola, inauguró esti alcuentru que se va celebrar en Xixón hasta’l xueves y que ta entamáu pola Sociedá de Promoción Esterior del Principáu (Asturex), en collaboración cola Federación d’Empresarios del Metal y Afines del Principáu (Femetal).

Pola señaló la utilidá d’esti foru p’amosar les capacidaes de les empreses asturianes del metal y atraer proyectos de valor altu. “Trátase d’un eventu únicu, porque ufierta a les compañíes de la comunidá la posibilidá de recibir a los sos posibles veceros nel so centru de producción, en cuenta de tener que desplazase a vender los sos productos fuera d’Asturies”, esplicó. Amás, valoró l’exemplu d’esti sector na aplicación de les últimes tecnoloxíes en procesos productivos y sorrayó el bon momentu que traviesa, amás de la so contribución al fortalecimientu de la economía rexonal.

Na so intervención, el conseyeru destacó’l sofitu a la internacionalización de les empreses asturianes como ún de los pegollos de la estratexa industrial que desenvuelve’l Gobiernu d’Asturies de forma consensuada colos axentes sociales al traviés del Alcuerdu pa la Competitividá Económica y la Sostenibilidá Social, dotáu con 12 millones pal periodu 2016-2018.

Pa eso, l’Institutu de Desenvolvimientu Económicu (Idepa) y Asturex impulsen un paquete de midíes que van dende planes sectoriales pal metal y la construcción, misiones comerciales y de prospección, participación en feries y foros, etcétera, al respaldu financieru que dan a la promoción internacional al traviés de delles convocatories d’ayudes.

Nos postreros trés años, l’Idepa sofitó 422 proyectos de internacionalización d’empreses asturianes rellacionaos cola contratación de técnicos en comerciu esterior, la participación en feries internacionales, viaxes comerciales, visites a veceros o la participación en llicitaciones internacionales y l’establecimientu d’aliances con otres empreses pa crear consorcios de cooperación, ente otres midíes.



Sofitu a la promoción internacional

Xunto a los demás programes de sofitu a la inversión y la innovación, les acciones impulsaes pola Conseyería d’Empléu pa potenciar la internacionalización, basaes n’iniciatives como la Estratexa d’Especialización Intelixente Asturies RIS3, la Industria 4.0, la participación en programes d’accesu a llicitaciones multillaterales o la dixitalización, ayuden a afitar un texíu industrial más diversificao, moderno y competitivo, a fortalecer les empreses y a asitiar los sos productos y servicios nel esterior.

El Principáu cunta con más de 1.155 empreses del metal, qu’empleguen a 28.800 trabayadores, según los últimos datos de la Encuesta de Población Activo (EPA). La so aportación al PIB asturianu ye del 11 %, con más de 5.000 millones, y les sos esportaciones superaron nel 2018 los 2.900 millones. Nel primer trimestre d’anguaño siguieron medrando hasta asitiase percima de los 722 millones.

Nos trés díes que va durar el foru, un grupu d’empreses de la construcción va tener reuniones entamaes cola collaboración de la Confederación Asturiana de la Construcción (CAC-Asprocon). El perfil de los participantes internacionales ye’l que más s’afái a la demanda de les firmes espositores, los sos proyectos d’inversión y l’interés pol sector asturianu.

Al actu d’inauguración del foru tamién asistieron l’alcaldesa de Xixón, Ana González; el vicepresidente primeru de la Cámara de Comerciu de Xixón, Pedro López Ferrer; el presidente de Femetal, Guillermo Ulacia, y la directora xeneral d’Asturex, Teresa Vigón.

 

Información sobre el documento

© Copyright 2006. Gobiernu del Principau d'Asturies