Gobiernu del Principau d'Asturies

Asturies, muncho más cerca

Tas en

Asturias.es Temes Infraestructures y territoriu Infraestructures va habilitar esta tarde un carril na carretera ...
 

Infraestructures y territoriu

Infraestructures va habilitar esta tarde un carril na carretera que xune Santantolín (Ibias) y La Riela, afectada por un argayu

La conseyería prevé que la vía s’abra dafechamente a la circulación na tarde del martes próximu. L’argayu, qu'obligó a cortar el tráficu esta mañana, prodúxose nel puntu quilométricu 13,5

22/03/2020

La Conseyería d'Infraestructures, Mediu Ambiente y Cambéu Climáticu va habilitar esta tarde un carril na carretera AS-29, que xune Santantolín (Ibias) y La Riela, en Cangas, pa restablecer el tráficu cortáu dende esta mañana por un argayu que se produxo de madrugada nel quilómetru 13,5, na marxe derecha de la plataforma.

La vía pasa pelos conceyos d’Ibias, Ayande y Cangas y constituye la exa principal de comunicación de numberosos núcleos de población, polo que la conseyería actuó de forma inmediata cola mira de facilitar la movilidá de la ciudadanía que tenga de movese obligatoriamente.

La retirada de la piedra desprendida, que ta realizándose con medios mecánicos, concretamente con un martiellu rompedor hidráulicu, va dexar habilitar un carril esta mesma tarde. Darréu, va reperfilase la turria afectada. A partir de mañana, llunes, va procedese a recoyer tol material cayíu sobre la calzada con una máquina retroescavadora.

La Conseyería d'Infraestructures prevé que la carretera quede abierta dafechamente a la circulación na tarde del martes próximu.

Información sobre el documento

© Copyright 2006. Gobiernu del Principau d'Asturies