Gobiernu del Principau d'Asturies

Asturies, muncho más cerca

Tas en

Asturias.es Temes Xusticia Asturies va disponer d'un modelu nuevu de xusticia gratuita ...
 

Xusticia

Asturies va disponer d'un modelu nuevu de xusticia gratuita meyor financiáu y adaptáu a les tecnoloxíes nueves

Esti reglamentu reemplaza al vixente dende 2007 p'afaelo a la llexislación aprobada nos años últimos. El testu plantega otros baremos económicos que van utilizase pa determinar los distintos conceptos que se van abonar nel réxime d'asistencia por abogáu o procurador

10/05/2020

El Conseyu de Gobiernu aprobó esta selmana un reglamentu nuevu d'asistencia xurídica gratuita que va ameyorar el financiamientu d'esti serviciu públicu y va afaer el modelu actual al esplegue de les tecnoloxíes de la información y la comunicación nel sistema xudicial.

Esta normativa reemplaza a la vixente dende 2007 p'afaela a la llexislación aprobada nos años últimos y rellacionada cola reconocencia y estensión del derechu a l'asistencia gratuita, el procedimientu alministrativu común y el réxime xurídicu del sector públicu.

Ente otres novedaes, regula un turnu específicu pa la orientación xurídica, defensa y asistencia lletrada a persones víctimes de trata y terrorismu, asina como a menores d'edá y persones con discapacidá intelectual o enfermedá mental que sufran abusos. Asina mesmo, caltién el turnu destináu a muyeres víctimes de violencia de xéneru.

El testu recueye tamién baremos económicos nuevos pa determinar los conceptos que van abonase por abogáu o procurador y actualiza les cuantíes a percibir polos colexos profesionales. En concreto, nos baremos que se contemplen pa l'abogacía auméntase la cuantía por asesoramientu y asistencia inmediata a víctimes de violencia de xéneru nes guardies de disponibilidá, hasta superar la que se paga pol serviciu de guardia por asistencia a la persona detenida o presa.

Na xurisdicción penal, la cuantía por actuaciones en procedimientos con tribunal del xuráu y n'otros de complexidá especial pasa de 477,85 a euros.

Tamién s'incluye un baremu nuevu pa procedimientos abreviaos énte l'Audiencia Provincial, que xube a 301 euros, y otru por asistencia a la comparecencia de prisión o solicitú de midíes cautelares penales, que va retribuise con 95 euros.

Otres novedaes del reglamentu nuevu, que s'estructura en seis títulos y 49 artículos, son estes:

  • Actualícense los miembros que formen parte de la comisión d'asistencia xurídica gratuita y introduzse la posibilidá de crear una o delles delegaciones d'esta comisión, si'l volume d'asuntos en tramitación asina lo xustifica.
  • Inclúyense medios d'averiguación y comunicación telemáticos, cola mira d'afaer el procedimientu a les novedaes tecnolóxiques pa la reconocencia del derechu a la prestación del serviciu. Tamién s'establez un procedimientu xeneral rellacionáu col orde xurisdiccional social.
  • Les cantidaes establecíes nos baremos van actualizase cada añu nel mesmu porcentaxe de medría de les retribuciones del personal funcionario de l'Alministración autonómica. Amás, facúltase al conseyeru a dictar anualmente una resolución na que se recueyan los baremos actualizaos.

Información sobre el documento

© Copyright 2006. Gobiernu del Principau d'Asturies