Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá El Principáu restrinxe l'usu del tresporte públicu n'autobús y ...
 

Tresportes y Movilidá

El Principáu restrinxe l'usu del tresporte públicu n'autobús y garantiza’l desplazamientu a los centros sanitarios

La llimitación del serviciu ta d'alcuerdu coles midíes adicionales últimes adoptaes pol Gobiernu central pa frenar la espansión del COVID-19. Los usuarios pueden informase de los horarios y frecuencies na web www.consorcioasturias.com

29/03/2020

El Gobiernu d'Asturies va realizar a partir de mañana un amenorgamientu nuevu de les frecuencies d'autobuses de tresporte públicu regular de viaxeros y va siguir calteniendo los servicios a los centros sanitarios.

Esta llimitación nueva nos principales corredores xestionaos pol Consorciu de Tresportes d'Asturies (CTA) produzse tres les últimes midíes anunciaes pol Gobiernu central, tendentes a minorar al máximu la movilidá, sobre manera nel tresporte públicu. Con estes midíes búscase contener la espansión del coronavirus COVID-19.

L'Executivu asturianu va siguir atendiendo les necesidaes de movilidá obligada de colectivos con servicios esenciales, como los trabayadores sanitarios a quien va garantizar el so desplazamientu n'hores punta y cambeos de turnu. La ufierta va amenorgase notablemente n'hores con menor demanda, les denominaes ‘horas valle’ y tamién en corredores non esenciales nesti momentu.

La Conseyería d'Infraestructures comunicó a los conceyos la obligación d'afaer los servicios urbanos, polo que les frecuencies fuera de les hores punta y de les llinies prioritaries han amenorgase considerablemente, d'alcuerdu cola paralización de l'actividá económica.

Asina mesmo, la conseyería caltién les midíes de prohibición del pagu del viaxe n'efectivo y la llimitación de places a un terciu de la capacidá de cada autobús, dexando llibre la primer fila, como midida de protección de los profesionales y usuarios.

El cambéu de servicios y los cuasi 300 puntos de venta y recarga de la tarxeta del Billete únicu que permanecen abiertos pueden consultase na páxina web del CTA www.consorcioasturias.com .

Los controles sobre viaxeros pa verificar que los desplazamientos realízanse por motivos autorizaos van intensificase dende la Delegación del Gobiernu n'Asturies y les fuerces de seguridá.

Información sobre el documento

© Copyright 2006. Gobiernu del Principau d'Asturies