Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies concluye’l nuevu xulgáu de Piloña, que ...
 

Aniciu

El Gobiernu d’Asturies concluye’l nuevu xulgáu de Piloña, que triplica la superficie actual y va emprestar serviciu a 14.000 vecinos de trés conceyos a partir de mediaos de febreru

Los residentes del conceyu, mesmo que los de Nava y Cabranes, van facer usu del equipamientu, que cuntó con una inversión de mediu millón d'euros. Les instalaciones permiten unificar les cuatro dependencies xudiciales qu'existíen hasta agora. El conseyeru de Presidencia remarca que l'inmueble, modernu y funcional, adáptase a les necesidaes d'un órganu que tramita añalmente más d'un millar d'asuntos

Un momento de la visita

11/01/2018

El Gobiernu d'Asturies remató les obres p'habilitar un nuevu Xulgáu de primer Instancia ya Instrucción en Piloña, una sede que triplica la superficie actual y que va emprestar serviciu a 14.000 vecinos del conceyu, lo mesmo que de Nava y Cabranes. Los trabayos para la construcción y acondicionamientu de les instalaciones cuntaron con una inversión de mediu millón d'euros y dexaron dotar a la parte de un equipamientu modernu, funcional y acorde a les necesidaes de la ciudadanía y el operadores xudiciales”, destacó'l conseyeru de Presidencia y Participación Ciudadana, Guillermo Martínez.

El conseyeru, acompañáu pola titular de Facienda y Sector Públicu, Dolores Carcedo, visitó güei el resultaáu de les obres y anunció que'l nuevu equipamientu va tar dafechu operativu na tercer selmana de febreru, a pidimientu del xulgáu pa embrivir los trestornos de la so actividá. Esti mes asitiaránse los sistemes de telecomunicaciones de voz y de datos y solo va quedar pendiente’l treslláu de los archivos y de los ocho trabayadores que presenten serviciu nel órganu, que tramita añalmente más d'un millar d'asuntos civiles y penales.

L'actuación permite unificar les cuatro dependencies qu'operaben hasta agora esvalixaes en distintes sales del Conceyu y ensin comunicación ente elles. Amás, l'inmueble de dos plantes, allugáu na zona de Xudes, dispón de nuevos espacios de trabayu, como una sala pa testigos, otra p'abogaos y procuradores, pa reconocencies y una más pa comunicaciones y asistencia a víctimes. La superficie útil ye de 728 metros cuadraos, distribuyíos en 309,40 nel nivel superior, qu'acueye'l xulgáu, el Rexistru Civil, la clínica forense, los despachos, les sales polivalentes, pa los profesionales y d'espera, y los aseos, y otros 356,80 metros cuadraos nel nivel inferior, onde s'alluguen les sales de vistes, d'espera y de reconocimientu, la zona de deteníos, los cuartones, l'almacén, l'archivu y los aseos.

“Con esti proyectu facemos realidá y consolidamos la nuestra prioridá de dotanos d'una Alministración de Xusticia áxil, de calidá y que satisfaiga dafechu les necesidaes de la ciudadanía”, señaló'l conseyeru de Presidencia. Desque fai una década'l Principáu asumiera les tresferencies en materia de Xusticia, invirtiéronse más de 45 millones nos 18 partíos de la rexón pa meyores y ampliaciones, como la puesta en marcha del Palaciu de Xusticia de Xixón y l'Institutu de Medicina Llegal, mesmo que la modernización d'equipamientos y sistemes tecnolóxicos.

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies