Gobiernu del Principau d'Asturies

Asturies, muncho más cerca

Tas en

Asturias.es Temes Investigación L'alcuerdu de concertación aboga por desenvolver la telemedicina ...
 

Investigación

L'alcuerdu de concertación aboga por desenvolver la telemedicina y garantizar la capacidá informática de los centros escolares

El pactu del Gobiernu d'Asturies colos sindicatos y la patronal prevé dedicar 188,6 millones a l'aplicación de 24 midíes sanitaries, educatives y sociales. El documentu inclúi'l compromisu de desplegar delles llinies d'ayuda para facilitar l'accesu a una vivienda digna, especialmente a los colectivos más vulnerables

07/08/2020

La concertación propón aprovechar les posibilidaes qu'ufierten les tecnoloxíes de la información pa la medicina y la educación. El desenvolvimientu de la telemedicina y la meyora de la dotación informática de los centros escolares son dos de los oxetivos del alcuerdu suscritu pol Gobiernu d'Asturies cola patronal y los sindicatos.

La Concertación pa la Recuperación d'Asturies (CREA) articúlase en cinco exes estratéxiques. La terceru denomínase Midíes sanitaries, educatives y sociales y divídese al empar n'otros cinco capítulos: fortalecimientu de la sanidá pública, midíes educatives, polítiques sociales, vivienda y retu demográficu. Les 24 iniciatives previstes para los dos próximos años sumen 188,6 millones, la segunda partida más elevada del pactu depués de la dedicada a sofitar la industria.

L'apartáu dedicáu a les midíes sanitaries aboga pola meyora de la rede d'atención primaria, el fortalecimientu del sistema de vixilancia y detección epidemiolóxica y l'impulsu de la investigación rellacionada cola pandemia por aciu la collaboración público-privada. Otru de los sos apuestes ye'l desenvolvimientu de la telemedicina, a la que foi necesariu recurrir nel estáu d'alarma y que se presenta como una opción con mayor relevancia nel futuru.

La pandemia tamién provocó grandes cambeos na educación. La suspensión de les clases presenciales nel últimu trimestre del cursu obligó a siguir la enseñanza de manera telemática. Tampoco foi posible impartir tola materia previsto al entamu del añu académicu. La concertación pon atención a dambos asuntos. Asina -y anque la opción prioritaria de la Conseyería d'Educación ye l'asistencia de tol alumnáu a los colexos ya institutos- contempla la dotación d'infraestructures, conexones y ferramientes informátiques abondes, pa que se garantice la educación telemática. Tamién aboga pola recuperación del temariu que nun se pudo dar. Otra prioridá ye garantizar la máxima prevención posible frente al coronavirus, mesmo por aciu midíes de seguridá ya hixene como cola dotación de material de protección abonda.

Dientro del capítulu de midíes sociales, l'alcuerdu prevé entainar la implantación del ingresu mínimu vital. Asina, recueye'l plan de la Conseyería de Derechos Sociales y Bienestar pa que quien perciben el salariu social namás precisen dar el so consentimientu pa pasar a cobrar l'ingresu mínimu. El pactu inclúi, amás, l'actualización del conveniu ente la mesma conseyería y el Serviciu Públicu d'Empléu (Sepepa) pa facilitar la incorporación de les persones que reciben el salariu social al mercáu llaboral.

En materia de vivienda y de retu demográficu, afítense trés grandes oxetivos: asegurar el derechu a una vivienda digna por aciu diverses llínees d'ayuda, fundamentalmente destinaes a colectivos vulnerables; evaluar el Plan Demográficu 2017-2027 ya impulsar la cohesión social y territorial, demanera, nes árees rurales.

Información sobre el documento

© Copyright 2006. Gobiernu del Principau d'Asturies