Gobierno del Principado de Asturias

Asturias, mucho más cerca

Estás en

Aniciu Gobiernu La campaña de vacunación contra'l gripe empieza mañana pa ...
 

Gobiernu

La campaña de vacunación contra'l gripe empieza mañana pa mayores de 65 años y muyeres embaranzaes

L'empiezu oficial va tener llugar el llunes a les 9:30 nel centru de salú de Teatinos, n'Uviéu. A los demás grupos de riesgu va alministráse-yos la vacuna tetravalente clásica a partir del 4 de payares. El Principáu adquirió 244. 000 dosis p’anguaño, con una inversión de 1,2 millones

20/10/2019

La campaña de vacunación contra'l gripe empieza mañana pa persones mayores de 65 años y muyeres embaranzaes, que pueden solicitar cita nos sos centros de salú.

L'empiezu oficial va tener llugar mañana, a les 09:30 hores, nel centru de salú de Teatinos, n'Uviéu.

Anguaño búscase l'oxetivu de que se vacunen el 65 % de los mayores de 65 años —nel 2018 llegóse al 57 %— y el 44 % de les xestantes. Nel casu de les embaranzaes, la Conseyería de Salú encamienta la vacuna pa protexer a los más mozos, yá que hasta pasaos los seis meses de vida nun pueden recibir la profilaxis. L'andada de los virus gripales incrementa'l riesgu de complicaciones nos naciatos y provoca ingresos y casos graves equiparables a los qu'afecten a les persones mayores de 65 años.

Nesta campaña, que remata'l 31 d'avientu, inclúyese pela primer vez la vacuna tetravalente de cultivu celular, que va alministrase a xestantes y persones con alerxes graves al güevu y a los antibióticos. A los mayores de 65 años va inoculáse-yos la trivalente reforzada, que llogra una respuesta inmune meyor nesti sector de la población.

A partir del 4 de payares, va inmunizase cola vacuna tetravalente clásica a los demás grupos de riesgu: persones inmunodeprimíes o con enfermedaes cróniques o obesidá. Tamién ta indicada pa quien conviven con persones de riesgu altu, personal de centros sanitarios y sociales, estudiantes en práctiques de Ciencies de la Salú y trabayadores de servicios públicos esenciales (policías, bomberos, protección civil, etc).

Pela primer vez va protexese con esta profilaxis a los naciatos prematuros mayores de 6 meses y menores de dos años.

Salú adquirió anguaño 244.000 dosis de vacuna, que supunxeron una inversión de 1.194.710 euros. Del total, 170.000 son de trivalente reforzada, 72.000 de la tetravalente clásica y 2.000 de tetravalente de cultivu celular.

Información sobre el documento

© Copyright 2006. Gobierno del Principado de Asturias