Gobiernu del Principau d'Asturies

Asturies, muncho más cerca

Tas en

Asturias.es Temes Salú El Principáu recuerda’l deber de respetar el calendariu escolar ...
 

Salú

El Principáu recuerda’l deber de respetar el calendariu escolar y de cumplir el protocolu sanitariu en tolos centros educativos

El Serviciu d’Inspección Educativa va vixilar que nun s’adelante materia nes escueles privaes que decidan abrir les instalaciones primero de qu’empiece’l periodu llectivu

04/09/2020

Les escueles privaes asturianes puen abrir les instalaciones dende’l 1 de setiembre, fecha afitada como principiu del cursu escolar, pero nun tán autorizaes a impartir clases al alumnáu. La Conseyería d’Educación anunció que’l Serviciu d’Inspección Educativa va vixilar el cumplimientu de la normativa y asina-y lo treslladó por escrito a les direcciones d’estos centros. Amás, el Gobiernu d’Asturies esixe tamién el cumplimientu estrictu de la normativa sanitaria afitada pa menguar al mínimu posible los contaxos de coronavirus.

El calendariu escolar, que’l so cambéu atópase agora mesmu en fase de tramitación, ye de cumplimientu obligáu pa tolos centros educativos del Principáu, yá seyan públicos, concertaos o privaos. Les clases van empezar y van rematar al empar en toos ellos.

Cuestión distinta ye que les direcciones de los centros decidan abrir les instalaciones díes primero de qu’empiece’l periodu llectivu, como previeron y solicitaron delles escueles. Esta ye una práctica habitual, autorizada llegalmente, que se repite tolos años. Pero nesi casu nun van poder adelantrar materia –un estremu que va supervisar la Inspección Educativa- y van haber que respetar escupulosamente’l protocolu sanitariu.

La Conseyería d’Educación puntualizó estes considerances nun comunicáu unviáu a les direcciones de los centros. Nél recuerda que “la disposición final primera de la Llei Orgánica 8/2013, de 9 d’avientu pa la meyora de la calidá educativa nun modifica lo establecío n’artículu 25 de la LODE (Llei Orgánica del Derechu a la Educación), qu’otorga a los centros privaos non concertaos autonomía pa establecer el so réxime internu, ente otres cuestiones”. D’alcuerdu con esta disposición, “la titularidá pue determinar l’apertura del centru correspondiente”.

Tala posibilidá –adelantar l’apertura del centru- nun afecta al calendariu llectivu. Asina, la resolución de 3 de xunu del 2020 de la Conseyería d’Educación, establez que les actividaes llectives van tener que se desenvolver ente les feches que s’afiten. Tamién avisa de que’l calendariu escolar “ye de cumplimientu obligáu pa tolos centros públicos y privaos de la comunidá, siendo responsabilidá de la dirección del centru docente’l so cumplimientu y correspondiendo al Serviciu d’Inspección Educativa la supervisión y control de la so aplicación”.

La Conseyería d’Educación ta anguaño tramitando’l calendariu escolar nuevu del cursu viniente p’adaptalu a los cambeos decidíos pol Conseyu de Gobiernu’l 28 d’agostu.

La propuesta, que ta siendo sometida a una ronda de consultes, va cumplir coles 175 xornaes llectives anuales y prevé empezar el cursu d’Infantil y Primaria el 22 de setiembre. Aparte, unifica l’empiezu de Secundaria, Bachilleratu y Formación Profesional (FP) el día 28 (de mano cuntábase con que Bachilleratu empezare’l 29 y FP, el 30).

Información sobre el documento

© Copyright 2006. Gobiernu del Principau d'Asturies