Gobierno del Principado de Asturias

Asturias, mucho más cerca

Estás en

Aniciu Información de los Conceyos El Circuitu de les Artes Escéniques crez coles nueves ...
 

Información de los Conceyos

El Circuitu de les Artes Escéniques crez coles nueves subvenciones de Cultura a los conceyos asturianos

Les ayudes del Gobiernu d'Asturies van permitir sofitar anguaño la programación teatral en 27 conceyos, lo que representa un 28% más qu'en 2018 y la mayor participación dende 2006. Les compañíes profesionales beneficiénse per primer vegada esti añu d'un financiamientu destináu específicamente a esta iniciativa nos presupuestos xenerales de la comunidá

21/06/2019

El Circuitu de les Artes Escéniques del Principáu va poder llegar esti añu a 27 conceyos, seis más qu'en 2018, a la vista del númberu provisional de solicitúes rexistraes tres la finalización del plazu de presentación el martes pasáu. Con esta cifra, el circuitu algamaría en 2019 el mayor númberu de conceyos participantes de tola so serie histórica, dende 2006.

Anguaño, per primer vegada, l'ayuda del Gobiernu d'Asturies a la programación d'artes escéniques de los conceyos realízase per aciu una llinia de subvenciones de concurrencia competitiva que se rixe polos principios d'igualdá, publicidá, tresparencia, oxetividá, eficacia y eficiencia.

“Esti nuevu sistema supón una meyora incuestionable na eficiencia y eficacia de les alministraciones, porque simplifica los trámites en comparanza col funcionamientu anterior del circuitu. Amás, facilita la xestión empresarial de les compañíes d'artes escéniques profesionales”, sorrayó'l viceconseyeru de Cultura y Deporte, Vicente Domínguez.

Domínguez aseguró qu'esti modelu evita de manera efectiva que la llimitación económica qu'establez la nueva Llei de Contratos del Sector Públicu afecte a la contratación de les empreses escéniques asturianes. Nesti sentíu, a diferencia del sistema anterior, nel que la viceconseyería, xunto cola totalidá de los conceyos, actuaba como un órganu contratante de cada compañía, agora, col nuevu modelu de subvenciones, cada conceyu ye un órganu contratante únicu para les empreses.

Per otru llau, l'aportación económica del Principáu al Circuitu d'Artes Escéniques recuéyese per primer vegada de forma singularizada y específica nos presupuestos xenerales de la comunidá, lo que contribúi al fortalecimientu y sofitu a les entidaes locales y al fomentu de les compañíes escéniques profesionales.



Un presupuestu de 250.000 euros

La llinia de subvenciones al circuitu tien un presupuestu de 250.000 euros para esti añu. L'importe solicitáu polos 27 conceyos xube provisionalmente a 224.087 euros. En 2018, el Principáu apurrió a esta iniciativa 197.000 euros, la metá de los 394.000 euros que l'Alministración autonómica y les corporaciones locales destinaron al pagu del caxé de 224 espectáculos programaos nos teatros y nes cases de cultura municipales.

Tocantes a los seis nuevos conceyos asturianos que s'incorporen al circuitu, unu ye de menos de 15.000 habitantes, trés, de menos de 10.000, y unu, de menos de 5.000.

“Díxose que'l nuevu sistema de sofitu a les artes escéniques suponía l'esmantelamientu del circuitu, que los conceyos pequeños nun podríen allegar, que'l creitu presupuestáu yera insuficiente y qu’ésti sería un añu en blanco pal sector escénicu asturianu. Agora, los datos oxetivos de concurrencia a la nueva convocatoria de subvenciones desmienten rotundamente toes eses afirmaciones”, afirmó Domínguez.

“Esti nuevu modelu, atináu dende una política cultural pública porque aguiya una mayor participación de los conceyos y repercute nel fomentu de les artes escéniques dende les alministraciones públiques, púnxose en marcha de manera impecable per parte de los técnicos del Serviciu de Promoción Cultural, con llarga esperiencia y una fonda conocencia del sector”, añedió'l viceconseyeru.

 

Información sobre el documento

© Copyright 2006. Gobierno del Principado de Asturias